Sisimiut eqqaanni aqqartartuugunartumik takunnittoqartoq

Innuttaasut aqqartartuugunartumik takunnittut pisortanut saaffiginnissuteqarsimasut, nittartakkakkut nutaarsiassiisartup, OLFI-p allaaseraa, nittartagaq illersornissamut sillimaniarnermullu tunngasunik allaaserinnittartuuvoq. 

Nakkutiginninneq pillugu Issittumi sakkutooqarfik Kalaallit Nunaannilu politiit suleqatigiillutik misissuisut, Værnsfælles Forsvarskommandop KNR-imut uppernarsarpaa.    

Sinerissap qanittuani aqqartartuugunartoq ingerlaartoq, qatanngutigiit marluk takunnittorlu alla immikkut isiginnaarsimagaat, OLFI allaaserisaqarpoq. 

Misissuineq aallartinneqartoq
Takunnissimaneq pillugu pingasunngornermi nalunaarutiginnittoqareersorlu takunniffiup eqqaani pisoqalaavissorpoq. 
Politiit misissuinerminnut atatillugu takunnissimasut pingasut oqaloqatigereeraat, Værnsfælles Forsvarskommandop tusagassiinermut pisortaata, Torben Kjeldsenip oqaatigaa.

Takunnittup ilaata aqqartartuugunartoq assilisimavaa, asserlu misissugassanngorlugu Illersornissaqarfiup paasiniaasartuinut nassiunneqareerluni.

OLFI-illi paasissutissaatai naapertorlugit takuneqarsimasoq ilumut aqqartartuunersoq suli qulakkiivinneqanngilaq.