Sisimiuni meeqqat inuusuttullu benzinanit tipigissaanut naamaartartut

Sisimiuni ajoraluartumik nuanniitsoqaqqippoq.

Sisimiuni meeqqat inuusuttullu quliniit ukiullit benzinamik, gassimik tipigissaatinillu naamaartarput. Tamanna Qeqqata Kommuniani pinaveersaartitsinermik siunnersortip, Inunnguaq Mørchip oqaatigaa.

Inuusuttut benzinap saniatigut allamik qanoq naamaartarnersut kommunimi iluamik ilisimaneqanngilaq, kisianni:

- Inuusuttut qamuteralannit, ATV-nit, biilinillu benzinamik orserfiinit ammarneqariaannaasunit naamaartartut paasivarput, Inunnguaq Mørch oqarpoq.

Naamaarnerlu ima annertutigilersimavoq, allaat kommuni benzinamik orserfiit matuisa parnaarsaaserneqarnissaannik inuusuttunullu ukununnga qamutit kitikkuminaannerulersinneqarnissaannik Facebookikkut kajumissaaruteqarluni.

Kommunip allakkamini ‘puukunik naamaarnermut atorneqarsimasunik nassaartoqartalersimasoq’, naamaarnerlu 'toqqoqqasumi' pisartoq allappaa.

Ataatsimut akisussaaffeqarneq

Taamaammat Inunnguaq Mørchip inuit akisussaaffimmik tiguseqatigiillutik tamatumanik unitsitsiniarnissaat neriuutigaa.

- Naamaarnermi ulorianartorujussuullunilu navianarpoq, siunnersorti oqarpoq.

Taassuma tamatuma annertussusaa piffissami matumani ilisimanngilaa. Isumaginninnermulli oqartussat naamaartoqartarnerata ajornartorsiutaanera pillugu siullermik marsip naanerani nalunaaruteqarfigineqarsimapput.

Naamaarnermi assersuutigalugu gassimik naamaarnermi toqusoqarnera ajornerpaamik kingunerisinnaagaa, Inunnguaq Mørchip oqaatigaa.

- Inimi mikisumi naamaartoqarpat silaannarmik amigaateqartoqalersinnavoq, tamannalu silalunnermik, meriarnermik, takusuusilernermi silaarunnermik imaluunniit toqunermik kinguneqartarpoq, Inunnguaq Mørch oqarpoq.

Kommuni maannamut qanoq amerlatigisunik nalunaarutiginninnernik pissarsisimanersoq taassuma ilisimanngilaa. Politiilli inuit benzinamik gassimilluunniit naamaarsimasut pillugit nalunaarfigineqartarnerat qaqutigoortuunngitsoq maajillu qaammataani maanna tallimassaanik kingullermik maajip qulingiluaani nalunaaruteqarfigineqarsimallutik paasissutissiissutigaat.