Sisimiuni inuit marluk imigassamik matusigallarneq pillugu: Sivisunerusinnaavorluunniit
- Coronamut atatillugu (imigassamik matusineq aaqq.) ajorinngilara. Ullut ikippulluunniit matoqqagallarnissaa. Coronap qaangiunnissaata tungaanut iliuusissaqarutta, arlaatigut ujaasigutta nassaassagatta, ikioqatigiinnikkut pisariaqarput tamakkua.
Sisimiuneersoq, Piitannguaq Kristensen Qeqqata Kommuniani imigassamik nioqquteqarnermik matusineq pillugu oqarpoq.
Qeqqata Kommunianimi imigassamik tuniniaaneq sassaalliuteqarnerluunniit januaarip ulluisa 25-ata tungaanut inerteqqutaavoq.
Borgmesterimmi kommuniminni, illoqarfinni arlalinni tunillatsissimasunik arlalinnik ullormut paasisaqartoqartarnera pissutigalugu tuniluutilertupallattoqarnera ernumassutigaa.
AAMMA ATUARUK Sisimiuni imerniartarfiutilik: Matusigallarneq paasisinnaanngivippara
Qeqqata Kommuniani tunillatsissimasut 500-nit amerlanerupput, tunillatsissimasunillu nutaanik ullormut paasisaqartoqartarpoq, taakkulu tunillatsiffiisa aallaaviat ilisimaneqanngillat.
Assersuutigalugu Maniitsumi, Kangerlussuarmi Sisimiunilu tunillatsissimasunik nutaanik ullut tamaasa paasisaqartoqartarpoq.
Naalakkersuisut tusagassiuutinut nalunaarutaanni ima allassimavoq: "Angerlarsimaffimmi pitsaanngitsumik ineriartortoqarnera meeqqanut ilaqutariinnullu taamaallaat eqquinavianngilaq, kisianni aamma Covid-19-ip tuniluunnerata siaruarnissaanut annertunerusumik aarlerinaateqalersissavaa imigassartorfiusumi ataatsimoortoqartillugu inuit tunillaassuuttoqarsinnaanera eqqumaffigineq ajormassuk."
"Sapaatip akunneri pingasuusinnaappulluunniit"
Maria L. Efraimsenip imigassamik nioqquteqarnerup matunissaanut aalajangiineq aamma isumaqatigaa. Inerteqquteqarnerlu sivisunerugaluarpat aamma ajorinavianngikkaluarpaa.
AAMMA ATUARUK Maniitsumi imerniartarfiutilik imigassamik inerteqquteqarneq pillugu: Taperserluarpara
- Ajorinngilara, tassa tuniluuttoq sukkanermik aamma tamakkunatigut tuniluussimanissaa ilimanarmat, matugallarnera ajorinngilara.
Ullut 14-iunerammi qanoq igiviuk?
- Sivikigivara. Pingasuusinnaappulluunniit.
Imigassat aalakoornartortallit 2,25 volumenprocentimit qummut volumenprocenteqartut tamarmik tuniniarneqartarneri sassaalliutigineqartarnerilu inerteqqutigineqarallarput.
