Maniitsumi imerniartarfiutilik imigassamik inerteqquteqarneq pillugu: Taperserluarpara
Qeqqata Kommuniani immiaaqqanik, viinik imigassanillu nioqquteqarneq januaarip ulluisa 25-annut inerteqqutaalerpoq.
Inerteqquteqarallalernissaq kommunimi borgmesterip Naalakkersuisunut qinnutigaa.
Nunarput tamakkerlugu corona pillugu malittarisassat nutaat tassa neriniartarfiit imerniartarfiillu nalunaaqutaq unnukkut qulinit ullaakkut tallimat tungaannut matoqqasalernerat ilutigalugu taama kissaateqarpoq.
- Taperserpara. Imerniartarfiit matunissaat aalajangerneqarneranni imigassamik nioqquteqarnerup tamarmi unitsinneqarnissaa ajunngilluinnartoq isumaqarpunga, Mark Skovbo Jensen oqarpoq.
AAMMA ATUARUK Qeqqata Kommuniani imigassanik aalakoornartortalinnik tuniniaasarnerit inerteqqutaagallalersut
Taanna imerniartarfimmik Nattoralimmik januaarip ulluisa 25-annut matoqqasussamik ingerlatsisumik Hotel Maniitsumik piginnittuuvoq.
- Imerniartarfiit matugaangata erngunnerit angerlarsimaffinnut nuunneqartarput. Taamaammat borgmesterip suliniutigisaa ajunngilluinnarsoraara, Mark Skovbo Jensen oqarpoq.
Ullut 14-iinnaanissaat neriuutigigaa
Taassuma oqartussat imerniartarfinni tuniluuttoqartarneraanerat aamma isumaqatigaa.
- Tamanna qularutissaanngilaq. Taamaammat imigassamik nioqquteqarnerup tamarmi matuneqarnera aamma ajunngilluinnartuusoraara, taamaalilluni tuniluuttoqarsinnaanera angerlarsimaffinnut mikinerusunut nuunneqassanngilaq.
Taassumali Nattoralik ammaqqissinnaalipallannissaa aamma neriuutigaa.
AAMMA ATUARUK Sisimiuni imerniartarfiutilik: Matusigallarneq paasisinnaanngivippara
- Piffissaq qaninnerusoq eqqarsaatigalugu sulisut ilaannut sapaatini akunnerni taakkunani isertitassaqanngitsunut sunniuteqassaaq. Taamaammat matoqqatitsineq ulluni 14-iinnarniussasoq neriuppunga, taamaalilluta ammaqqissinnaassalluta, Mark Skovbo Jensen oqarpoq.
Matusineq sivitsorneqassappat taava ikiorsiissuteqartoqarnissaa kissaatigaa:
- Ullut 14-it pineqartillugit ikiorsiissuteqartoqarnissaa pisariaqanngilaq, kisianni sivitsorneqaqattaassappat taava suliffeqarfiit ilaannut ikiorsiissuteqarnissap eqqarsaatigilernissaa isumatusaarnerussaaq.
