Sisimiuni imerniartarfiutilik: Matusigallarneq paasisinnaanngivippara

Sisimiuni imerniartarfimmik Kukkukuumik piginnittup unnugumiit sapaatip akunnerini marlunni imigassallersinnaajunaarnini iluarinngilluinnarpaa.
Sisimiuni imerniartarfik Kukkukooq. Assi © : Kukkukooq - Privatfoto
Allattoq Alice Sørensen
januaarip 12-at 2022 13:03

- Amerlanerit akiuussusersorneqareerput, taamaammat ajorluinnarpoq.

Sisimiuni imerniartarfimmik Kukkukuumik piginnittoq Søren Andersen taama oqarpoq.

Naalakkersuisut borgmester Malik Berthelsenimit Siumumeersumit imigassamik interteqquteqarnissamut qinnuigineqareerlutik kommunimi imigassamik aalakoornartortalimmik sapaatit akunnerini marlunni matusinissamut akuersipput.

AAMMA ATUARUK Qeqqata Kommuniani imigassanik aalakoornartortalinnik tuniniaasarnerit inerteqqutaagallalersut

Kukkukooq ulluinnarni arfinerniit unnuap-qeqqata tungaanut ammarsarpoq, sapaatillu akunnerisa naanerini unnuakkut pingasunut matusarluni. Maannali matoqqasariaqalerpoq.

Søren Andersenip suliunnaarallartitsinissi ajuusaarutigeqaa.

- Sulisut katillugit arfineq-marluk arfineq pingasuusut isertitaarullutillu inuuniutaarutissapput, piginnittoq oqarpoq.

Killilersuinernit taarsiissuteqartoqarnissaa amigaatigigaa

Qeqqata Kommuniani coronamik tunillatsissimasut maanna 500-it sinnerpaat. Taamaakkaluartoq imerniartarfiutillip matusigallarneq paasiuminaatsippaa.

Imigassat aalakoornartortallit sassaalliutigineqarsinnaanerat Naalakkersuisunit marlunngorneq januaarip aqqarnganiit marlunngorneq januaarip 25-ata tungaanut unitsinneqarpoq. Piffissami tassani imeruersaatit 2,25 promille sinnerlugu aalakoornartortallit Qeqqata Kommuniani tuniniarneqaqqusaassanngillat.

Coronap tuniluunnerata nalaani imigassamik matusigallarnissamik borgmesteri siusinnerusukkut ataasiarluni kissaateqareernikuuvoq. Tamanna ukioq kingulleq aggustip aqqarneq-aappaaniit 18-iata tungaanut pivoq.

AAMMA ATUARUK Sisimiuni imigassap inerteqqutigineqarnera sivitsorneqartoq

- Taamani 500.000-it 1 million koruunillu akornanni annaasaqarpunga. Taamani aamma ikiorsiissutinik pinngilagut. Søren Andersen oqarpoq.

- Killilersuillaqqinnermisulli isertitassaraluanik annaasanik ikiorsiillaqqitsigisuuppara imigassallersinnaanermik matusineq paasinarnerussagaluarpoq.

Imerniartarfiutinniit tunillaassuunneq aallartissagaluarpat qanoq igissagaluarpiuk?  

- Peruluttoqanngilaq aamma napparsimmavimmi uninngasoq ataasiinnaavoq, taamaammat matusigallarneq paasisinnaanngivippara, Søren Andersen naggasiivoq.

Kommunip tuniluuttoqarnera ernumassutigigaa

Nuna tamakkerlugu neriniartarfiit imerniartarfiillu januaarup 25-ata tungaanut imigassamik aalakoornartulimmik unnukkut quliniit tuniniaaqqusaajunnaarput.

- Angerlarsimaffimmi pitsaanngitsumik ineriartortoqarnera meeqqanut ilaqutariinnullu taamaallaat eqquinavianngilaq, kisianni aamma Covid-19-ip tuniluunnerata siaruarnissaanut annertunerusumik aarlerinaateqalersissavaa imigassartorfiusumi ataatsimoortoqartillugu inuit tunillaassuuttoqarsinnaanera eqqumaffigineq ajormassuk. Naalakkersuisut Qeqqata kommuniani imigassamik matusigallarnissaq pillugu tusagassiutinut nalunaarumminni allapput.

Nunatta nakosaaneqarfiata kisitsisaatai malillugit Qeqqata Kommuniani innuttaasut 68 procentii marloriarlutik coronamut akiussuserneqarsimapput.