Sisimiuni imigassap inerteqqutigineqarnera sivitsorneqartoq

Sisimiuni imigassamik tuniniaaqqusaannginneq unnugu unnuap-qeqqanut qaangiuttussaagaluarpoq. Tamannali ullunik marlunnik sivitsorneqarpoq – taamaammat tuniniaaqqusinnginneq pingasunngorneq ilanngullugu sivitsorneqarpoq.

Naalakkersuisut siulittaasuat, Múte B. Egede tusagassiortunik katersortitsinermi oqarpoq.

Imigassamik inerteqquteqarneq nunaqarfinnut Sarfannguanut Itillimullu aamma atuupput.

Nunatsinni illoqarfiit annersaata tulliani coronamik tunillatsissimasut sapaatip akunnerata siuliani amerlatserujussuarnerat pissutigalugu borgmesteri, Malik Berthelsen kommunimilu pisortaaneq Juliane Henningsen imigassap matuneqarallarnissaanik Naalakkersuisunut qinnuteqaateqarput.

SIsimiuni tunillatsissimasut maanna 73-iupput.

- Sisimiuni inuit affaat sinnerlugit tuniluuttoqarnerani misissorneqarput. Sisimiuni tuniluuttoqarnera maanna aqunneqarsinnaalluarpoq - qaangiutiviilinngikkaluartorli ilorraap tungaanut ingerlasoqarpoq, nakorsaaneq, Henrik L. Hansen oqarpoq.

- Coronalli ilaat delta aqukkuminaatsuuvoq. Tuniluutiinnavittarpoq. Upernavimmi tunillatsissimasunik pingasunik paasisaqartoqaqqeqqammerpoq, aamma Nuummi Aasiannilu ullup ataatsip kingulliup ingerlanerani paasisaqartoqarpoq. Akiuussutissamik kapitissimasut amerlinissaata tungaanut taama inissisimassaaq.

• Innuttaasut 68 procentii ikinnerpaamik ataasiarlutik kapitissimapput.
• Innuttaasut 53 procentii tamakkiissumik kapitissimapput.
• Innuttaasut 32 procentii suli kapitinneqanngillat.

Nakorsaanerup oqarnera naapertorlugu inuusuttut akiuussuserneqarsimanngitsut Sisimiuni tuniluutsitsinerupput, assersuutigalugu erngunnerni nangigiarnernilu.

- Inunnilli akiuussusersuineq qaammat kingulleq ingerlalluarpoq. Inuusuttut aamma akiuussuserneqarnissaat pingaartipparput, tamannalu ingerlalluartorujussuuvoq. 12-init 15-inut ukiullit quliugaangata pingasut akiuussuserneqarput, nakorsaaneq oqarpoq.

- Inuusuttuni 20-it sinnerlugit ukioqartuni sisamaagaangata pingasut siullermeertumik akiuussuserneqarsimapput. Taamaammat tamanna ingerlalluaannassappat tamarmillu tamakkiisumik akiuussuserneqarsimappata ukiarnissaanut inissisimalluassaagut, Henrik L. Hansen oqarpoq.

Sisimiuni tuniluuttoqarnera pissutigalugu killilersuinerit sukannersut atuutsinneqarput.

Inuit amerlanerpaamik 20-t katereqqusaapput tamanillu ornigarneqarsinnaasuni assersuutigalugu pisiniarfinni, napparsimmavimmi, bussini taxanilu kikkut tamarmik qanermut assiaquteqassallutik.

Neriniartarfimmut imerniartarfimmulluunniit iserniartut tamakkiisumik akiuussutissamik kapitissimasariaqarput imaluunniit coronamik tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsisariaqarlutik.

Malittarisassat taakku aggustip ulluisa 24-at ilanngullugu atuutinneqassapput.

Nutarterneqarpoq…