Sisimiuni aserorterinerpassuit
Sisimiuni aatsitassarsiornermik ilinniarfiup maskiinaataat sapaatip akunnerani ataatsimi pingasoriarluni aserorteriffigineqarput, Kalaallit Nunaanni Politiit tusagassiuutinut nalunaarummi allapput.
Aserorterinerinerpassuit kingunerisaanik juunip 17-iani naggataarutaasumik misilitsittoqarnissaanut maskiinat sisamat ilaatigut amigaatigineqarput.
Aserorterinerillu 60.000 koruunit missaannik akeqarnissaat politiit nalilerpaat. Anignaasalli eqqortumik annertussusaat ilisimaneqanngitsoq, taakku allapput.
- Immikkoortortatsinni taama pinerluuteqarnerit inuiaqatigiinnut aamma Aatsitassarsiorfimmi ilinniartunut ataasiakkaanut kinguneqarput, Sisimiuni politiinit politikommissæri, Karl Jørgen Lennert oqarpoq, nangillunilu:
- Politiit tungaanniit aserorterisoqartarunnaarnissaanut sapinngisarput tamaat iliuuseqarpugut, pinerluuteqarsorineqartullu nassaarereerlutigit, taakkulu ukiukitsuusut paasineqarpoq.
Ukiukitsut pillaatissiissutigineqarsinnaasumik pinerluuteqaraangata inunnit isumaginnittoqarfik attavigineqartarpoq, politiillu tungaanniit suli nakkutiginnittoqartoq politiit paasissutissiissutigaat.