Sisimiuni anorlernerani anorisaammik ajutoortoqaqqittoq
Nukissiorfiit Sisimiuni misilittaaffiani anorisaat anorersuarnerani aserorpoq.
Nukissiorfiit nittartakkami paasissutissiivoq, anorisaallu qupisimanerarlugu ilisimatitsissutigaa.
Anorisaammik aappassaanik aserortoqarpoq. Siorna 2019-imi januaarimi anorisaatip suluusaa katappoq.
Anorisaatit tamarmik pingasuusut suluusaat juulimi taarserneqarput, Nukissiorfiillu ajornartorsiutaasoq aaqqissimasorigaluarpaat, tamannali naammassimanngilaq.
- Soorunami tamanna pisoq assorsuaq uggoraarput tassami kinaluunniit eqqarsanngilaq anorisaat taanna aamma ajortittooqqissasoq, Nukissiorfinni pisortaanerugallartoq, Claus Andersen-Aagaard oqarpoq.
AAMMA ATUARUK Vindmølle taber sin vinge i Sisimiut
Anorisaat misilittaavimmi najugaqartoqarfiunngitsumiippoq. Taamaammat aserorneranik inunnik ajoqusertoqanngilaq.
Misilittaavimmi anorisaatit assigiinngitsut misilerarnissaat anorisaatillu kalaallinut innuttaasunut siunissami nukissiuteqarnermik pilersueqataalersinnaanersut paasiniarnissaat siunertaavoq.
Anorisaat ajutoortoq nioqqutissiortumit, Solid Wind Powerimeersuuvoq, ajutooqattaarneralu Nukissiorfiit ajuusaarutigaat.
- Anorisaatinik taakkorpianik misilittakkavut pitsanngitsut soorunami pilersaarusiornitta ingerlaqqinneranni nalilersuinitsinnut ilaassapput, tassa nunatsinnik qanoq nukissiamik ataavartumik pilersuinissarput eqqarsaatigalugu, Claus Andersen-Aagaard oqarpoq.
