Siriusip alapernaarsuisussai issersuup ataani qaammat ataaseq sungiusartinneqartut
Qimussimik alapernaarsuisunut tusaamasanut peqataarusullutik nalunaarsimasut 50-iupput, taakkunanngalu arfineq-marluinnaat maanna sinnerullutik. Issittumi ukiukkut qaammat ataaseq sungiusartoqarneranut atatillugu kingulliit marluk peerneqartussaassaapput.
- Ilaat sisorarneq misilissimanngilaalluunniit, taamaammat tunngaviusumik pisinnaasassat aallaqqaasiutigisarpagut suullu tamaasa naqqanit ilinniartitsissutigineqartarput - qanoq atisalersornissaq, sumiissusersiornissaq, tupermik nappaanissaq, ikumaartitsiviup atornissaa, kalaallit qimmiisa aqunnissaat kiisalu aamma apummik illuikkiornissaq.
- Sungiusartinneqarnerminni soorunami aamma pinngortitaq, uumasut aarlerinarsinnaasullu pillugit ilinniartinneqassapput, aamma nukersortillugit sungiusartarpagut, Anders Kjærgaard forsvaret.dk-mut taama oqarpoq.
Taanna 2009-2013-imi Siriusip alapernaarsuisuinut peqataavoq maannalu Siriusip piareersaatitut ilinniarfiani pisortaalluni ukiukkullu sungiusaanermi ilitsersuisuulluni.
Aamma atuaruk Siriusimi alapernaarsuisut taama akeqarput
Tamaviaarnissaq sungiusarnermut ilaavoq
Sungiusartut issittumi sungiusarnerminni ilaatigut sikumi alluaminngaanniit nammineerlutik qaqiniarsaritinneqassapput. Aamma sisoraaserlutik qamutinik 85 aamma 115 kilot missaannik oqimaatsigisunik kalitaqarlutik ullup unnuallu ingerlanerani 100 kilometerinik ingerlaassapput, soorunamilu aamma qimussersinnaasussaassallutik.
- Sungiusartut sakkortuumik sungiusarneqassapput, pikkorissarnerullu immikkoortuani siullermi tamarmik immikkut misigisaqalaavissorput. Taamaasilluta maani inuilaami immitsinnut ilikkarluartarpugut, tamannalumi aamma siunertaavoq, angutimmi marlukkuutaarlutik qaammaterpassuarni angalasarnerminni imminnut pisariaqartilluinnassammata, Anders Kjærgaard Mestersvigimi sungiusarfiusumit oqarasuaatikkut qaammataasakkortukkut forsvaret.dk-mut taama oqaluttuarpoq.
Siriusip qimussimik alapernaarsuisuinut peqataassaguit Forsvarimi imaluunniit Beredskabstyrelsimi sakkutuujunerit naammaginartumik naammassisimassavat. Timersornikkut sungiusarluarsimassaatit aammalu peqqissuullutik, ilaquttannut tunngasut qularnaarsimassavatit, kigutigissuullutik, siussarluttuussanngilatit kiisalu aamma isumannaallisaanermut tunngatillugu akuerineqarsimassaatit.