Siriusimi alapernaarsuisut taama akeqarput
23 million koruunit. Aningaasat taama amerlatigisut danskit naalagaaffiata Tunup Avannaani alapernaarsuinut Siriusikkunnut siorna atorpai.
Folketingimut ilaasortap, Doris Jakobsenip apeqquteqaateqarnerata kingorna Illersornissaq pillugu ministeri, Nick Hækkerup taama akissuteqarpoq.
Issittoq pillugu nassuiaat Folketingimi eqqartorneqarmat, Doris Jakobsenip tamatumunnga oqaaseqartitatut, ilanngullugu apeqqutigaa nakkutilliisut Siriusikkut qanoq aningaasartuutaasartiginersut. Doris Jakobsenip taamatut apeqquteqarnerminut erseqqissaatigaa Kalaallit Nunaanni sakkutuut nakkutilliisut allat sipaarfiginagit Siriusikkut nakkutilliisarneri taamaatittariaqaraluartoq.
- Kalaallit Nunaanni sakkutuut nakkutilliisut sipaarfigineqarpata tamanna inuit inuunerinik aammalu angallannerup isumannaatsumik ingerlanneqarsinnaajunnaarneranik kinguneqarsinnaavoq. Ullumikkut atortorissaarutit atorlugit, soorlu satellit-ikkut, Tunup avannaarsua nakkutigineqarsinnaalluarpoq, inuusuttut sakkutuut Tunup avannaarsuani qimusserlutik qiulerlutillu nakkutinngikkaluarlugit, Doris Jakobsen oqarpoq.
Illersornissamut ministerip akissuteqarnermini erseqqissarpaa, Tunumi nakkutilliisut pingaarnertut suliassaat tassaasoq piginnittussaanermik illersuineq, aammalu oqaatigalugu Siriusikkut allarpassuarnik suliaqartarmata. Suliaasa ilagaat annaassiniarnerit, nunap eqqissisimatitap nakkutigineqarnera, ilisimasassarsiortunik nakkutilliinerit aammalu uumasunik kisitsinerup saniatigut avatangiisit nakkutiginerat.
