Sipaarniarnerit aningaasanut inatsit annaatissavaat
Aningaasanik eqquiniaatitsinermi akitsuutip marloriaatinngorlugu Aningaasaqarnermut Naalakkersuisup siunnersuutaa, Inatsisartuni isumaqatigineqanngimmat, aappaagumut Aningaasanut Inatsimmi aningaasat 20 million koruunit amigaataalerput.
Aningaasaqarnermut Naalakkersuisoq ippassaq KNR-imut nalunaarpoq, aningaasanik matussutissanik nassaarsimalluni. Taakkulu nassaarineqarput sipaarnikkut. Suminngaanniit sipaarutigineqarsimasut Maliina Abelsenip maannakkuugallartoq oqaatigerusunngilaa.
Kisiannili naatsorsuutigineqarsinnaagunarpoq imigassat imeruersaatillu puuisa akitsuuserneqarneri aappaagumut naatasorsuutaassasoq. Taamaaliortoqassappallu taakku akitsuuserneqarnerisa Nunatta karsia 10 million koruuninik isertitaqarsinnaassaaq.
Siunnersuut taanna Inatsisartuni ilaasortat amerlanerussuteqartut ippassaq isumaqatiissutigaat. Imigassat puuisa akitsuuserneqarnera 100 procentiussasoq siunnersuutaavoq, taakkununnga ilaanani immuit assigiinngitsut puui, tassami taakku akitsuuserneqannginnissaat siunnersuutaammat.
Taama siunnersuuteqarneq Siumumit ilassineqanngilaq. Siumut siulittaasua, Aleqa Hammond isumaqarpoq, inuit aningaasaataannik tigooraanikkut amigartoorutit matussuserneqartunaasiit.
Sulili maannamut ilisimanngisarput tassaavoq 20 million koruunit tamakkerlugit aningaasanik nassaarniarmi kikkut eqqugaanerussanersut.
Demokraatit siunnersuutigaat ICC-mut tapiissutaasartut millisaaffigineqassasut, taamatullu aamma Great Greenlandimut amernik tuniserni tapiissut ilanngarneqassasoq siunnersuutigalugu.
Inatsisartunit ICC 700.000 koruuninik tapiiffigineqassasoq sapaatip akunnerani uani aalajangerneqarpoq, naak Naalakkersuisut siusinnerusukkut isummeraluartut, ICC-mut tapiissutaasartut million koruunigajannik ilanngarneqassasut.
Aningaasanut Inatsisissap aaqqivinnginnerani Great Greenland nalunaaraluarpoq Namminersorlutik Oqartussanik tapiissutinik pisariaqartitsinatik. Sivitsunngitsorli taakku isumaat allanngorpoq oqarlutik 12 million koruuninik atorfissaqartitsillutik. Taamaattumik Naalakkersuisut isummerput Great Greenland 8 million koruunik tapiiffiginiarlugit.
Inatsisartut ataatsimiinerisa ulluisa kingullersaanni, tassa marlunngorpat, Aningaasanut Inatsisip pingajussaaneerlugu oqallisigineqarnerani paasinarsissaaq kisitsinissaarsuaq ajunngitsumik naammassineqassanersoq.
