Sipaarniarneq isumaqanngitsoq
Nunarsuarmi takornariat amerliartuinnartut Kalaallit Nunaata iluaqutigissappagit, ataatsimilluunniit takornariaqarnermut sullissisut aningaasatigut ilanngartuiffigisariaqanngillat, Sisimiuni takornariaqarnermik suliaqartut ilaat oqarpoq.
- Eqqumiiginalaanngitsuunngilaq. Assersuunneqarsinnaavoq piniartoq qinnuigigaanni puisinik amerlanerusunik pisaqaqqullugu, illuatungaanilli aallaasaata imassanik ilanngartuiffigalugu.
Aleqa Hammondip politikkia pillugu Hotel Sisimiuni pisortaq Anette Lings oqarpoq. Tassa illuatungaani takornariaqarneq piorsaaffigerusuppaa, sipaarfiginiarluguli pilersaaruteqarluni.
Neriorsuinerlunneq
Aasaq ataatsimeersuarnermi Naalakkersuisut siulittaasuata ersarilluinnartumik oqaatigigaluarpaa, Visit Greenlandip sipaarniarfigineqartarnera tamaannga killeqartoq. Sunaaffali asuli oqartoorneq. Kinguninnguami Aleqa Hammondip neriorsuutini tunuinnarlugu takornariaqarnermi suliaqartut 12 procentimik ilanngaavigai.
Sisimiuni takornariaqarnermik suliaqartut Visit Greenlandip ilanngartuiffigineqaqqinnera assut iluanngitsuusoq isumaqarput, taannami Kalaallit Nunaata nunarsuarmut avatitsinnut attaveqaatigimmagu.
Namminneq aalajangiissagaluarunik aningaasaliissutit amerlissagaluarpaat, taamaalilluni Kalaallit Nunaat takornarianut pilerinarnerulissagaluarmat.
Takornariaqarneq iluatsilluartoq
Anette Lings takornariaqarnerup annertusaaffigineqarnissaanut tigussaasumik siunnersuutissaqarpoq.
-Island qiviarutsigu, ukiualunnguit matuma siorna aningaasaqarnerlorujussuarput. Maanilu iliuuserineqartut illuatungerluinnaanik iliuuseqarput. Islandimi tuniniaanermi pilerisaarutinut aningaasaliissutit qaffariarujussuarneqarput, inuit amerlanerusut Islandimik pilerisaareqqullugit. Takornarialerisutik pingaartillugit iliuuseqarfigaat, aningaasanik amerlanerusunik nunamut isaatitsiniassammata. Ullumikkut aningaasaqarnertik ilorfaap tungaanut saatsissimavaat, takornariallu amerlanerusut pissarsiarisimallugit. Maanili killormorluinnaq iliuuseqarput, aningaasanik ilanngarterigamik, Anette Lings KNR-imut oqarpoq.
Taanna isumaqarpoq Aleqa Hammondip misilittakkani naapertorlugit takornariaqarneq ilisimasaqarfigaluaraa, taamaattumik tupigusuutigaa Naalakkersuisut siulittaasuata takornariaqarnerup ineriartortinnissaa akimmisimmagu.
- Aleqa Hammondip takornariaqarneq ilisimasaqarfigeqaa, taamaattumik tupigusoqaanga. Nalunngilara ineriartortinnissaa kissaatigigaa. Nalornisigineqarsinnaanngilaq sipaarniarnermi sutigut tamatigut ilungersunartorsiortoq. Nalornisiginngilaralu Island isiginiarnerugutsigu, qanoq iliorsimasut takullugu allatigullu sipaarniarlutik, isumassarsisissinnaagaatigut, Anette Lings oqarpoq.
