Sillimaniarneq pillugu politikkikkut nutaamik isumaqatigiissusiortoqalerpoq
-Urani pineqartillugu naalagaaffeqatigiinnut suliassaanera ataatsimoorullugulu suliassaanera isumaqatigiissutaalluinnarpoq. Susassaqarfiuvoq akisussaassusilimmik eqqartugassarput, danskimmi susassaqarfimmut tassunga politikkiata allanngortinnissaa alloriarnerusussaavoq annertooq, danskit nunanut allanut ministeriat Villy Søvndal, ullumi isumasiuinerup kingorna oqarpoq.
Kalaallit Nunaata Danmarkillu akornanni suleqatigiinnissamik isumaqatigiissutissaq naammassineqalersoq innersuussutigaa. Isumaqatigiissummi, nunanut allanut politikkimik nukittorsaanissamik siunertaqarfiusumi, aatsitassat pillugit aalajangiinerni Naalagaaffeqatigiinnut sillimaniarnikkut pingaarutilinni Danmarkip tamatigut peqataatinneqartarnissaa aamma naqissuserneqarpoq. Uranilu kisiat pineqanngilaq, saffiugassalli qaqutigoortut aamma pineqarput.
-Saffiugassat qaqutigoortut pineqartillugit Kalaallit Nunaat Danmarkilu tunngaviatigut isumaqatigiipput, naalagaaffeqatigiinnulli tunngasut pineqarput, taamatullu nassueruteqarneq pingaaruteqarpoq, tunngaviatigummi isumaqatigiinnitsinnut takussutaammat, ministeri naqissusiivoq.
Isumaqatigiissutissap ilaatut aamma nunanut allanut sillimaniarnermullu politikkimut tunngatillugu kalaallit danskillu attaveqatigiiffissaannik pilersitsisoqassaaq. Isumaqatigiissut Nunanut allanut pisortaqarfimmi Nunanullu allanut ministeriaqarfimmi marloriarlugu suliarineqareerpoq, marsimilu ataatsimiinnermi atsiorneqarnissaa pilersaarutaagaluarluni. Qinersisoqarnissaali pissutigalugu Kalaallit Nunaanni naalakkersuisuisunngortitsisoqarnissaanut kinguartinneqarsimasoq, nunanut allanut ministerip paasissutissiissutigaa. Isumaqatigiissutip imarisaanik itisiliiniarnani KNR-imut oqaatigaa.
