Silarluk kujataata kitaanut ullumi anngutissaaq

Silarluup kujataata kitaa ullup ingerlanerani tikissagaa, DMI ullaaq manna ilisimatitsivoq.

DMI-mi silasiortup Jens Lindskjoldip oqarnera naapertorlugu silarlussuaq illoqarfinnut Paamiunut, Nuummut Maniitsumullu appakaatissaaq.

- Ullaaq manna siullermik siallilissaaq unerisimassallunili, kisianni aporaaffiit sineriammut pippata anorilu kujasimmut saqippat kujataata kitaata sineriaani anorlernerulissaaq, oqarpoq.

Nuummi silarlunnerpaassaaq tamaani ulussaarsuartut sakkortutigisumik anoraasuartarnissaa naatsorsuutigineqarluni. Nuummi taamaammat sekuntimut 33 meterit sinnerlugit anoreqassaaq.

Nuummi ulussaarsuarnerata sakkortunerpaaffiani mittarfiup eqqaani Qinngorpumilu anoraasuarnerit sekuntimut 35 aamma 38 meteriussangatinneqartut, DMI ilisimatitsivoq.

Taamaammat DMI aamma Kalaallit Nunaanni Politiit ajutoortoqannginnissaa pillugu iliuuseqartoqarnissaa innersuussutigaat.

Politiit Facebookimi innersuussutigaat aneerasaartarfinni pequttat pigisallu isumannaarsorneqassasut aneerasaartarfimmit tingitaallutik allanut navianartorsiortitsinnginniassammata, kiisalu umiatsiat umiarsualivimmit saavittuunnginnissaat pillugu isumannaarsorneqarlutik.

Sivikitsumik ulussaarsuassaaq sivisuumilli anorlissalluni

- Ullup qeqqata kingorna ulussaarsuup sakkortunerpaanissaa naatsorsuutigaarput. Ulussaarsuarnerali sivikitsuinnaassaaq, taamaammallu ualikkut sakkukilliartulissalluni ”taamaallaallu” ulussaarsuartut sakkortutigisumik anoraasuartassalluni.

Imaappoq sekuntimut 25-it 30-illu meterit akornannik anoraasuartassaaq, unnugulu sekuntimut 18 meterit tikillugit anorsaasuartassalluni.

- Ulussaarsuartut sakkortutigisumik anorersuarnera sivikikkaluarluni aqagu aatsaat anoraarussimassaaq, Jens Lindskjold oqarpoq.

Anoraasuarnerit ulussaarsuartut sakkortutigigaluartut anori Kalaallit Nunaanni sungiusimaneqartunit sakkortunerunngitsoq silasiortup tikkuarpaa.