Ilisimatusartoq: Ataatsimeersuarneq politikkikkut iluatsinneqaraluartoq naammaqqajanngilaq
Silap pissusia pillugu ataatsimeersuarneq COP24 Polenimi ingerlanneqarmat, silap pissusiata allanngoriartornera akiorniarlugu sulinerup qanoq ingerlariaaseqarnissaa nunarsuarmi nunat isumaqatigiissutigaat. Ajunngilaq, annertunerusunilli anguniagaqarnissaq pisariaqarpoq.
Sebastian Mernild, silap pissusianik ilisimatusartoq Norgemilu illoqarfimmi Bergenimi Nansen Centerimi pisortaaneq, isumaqatigiissut silap kissatsikkiartornerata agguaqatigiissillugu gradit marluk inorlugit anguniagaqarfiginissaanik imaqartoq pillugu taama oqarpoq.
- Silap pissusia pillugu ataatsimeersuarneq politikkikkut iluatsilluarpoq. Silap kissatsikkiartornerata annikillisarnissaanut suleriusissaq nunat isumaqatigiissutigaat.
- Isumaqatigiissutigineqartorli silap kissatsikkiartornerata gradinik marlunnik ataateqqatinniarnissaanut naammanngilaq. Piviusormi tassaavoq 2100-mi gradit 3-4-t anguneqarnissaat, Sebastian Mernild taama oqarpoq.
AAMMA ATUARUK Ilisimatooq: Silap pissusia pillugu ataatsimeersuarnermi angusat pakatsinarput
Taanna aamma Naalagaaffiit Peqatigiit IPCC-llu silap pissusia pillugu nalunaarusiaannik pingaarnertut suliarinnittuuvoq siuliilu aamma suleqataaffigisimallugit.
Inerniliussat paatsuugassaanngillat, taamaammat ilisimatusartup politikkikkut sulissutigineqartup annertunerusumik anguniagaqarfiunerunnginnera pakatsissutigaa. Ilaatigummi nunat arlallit – aamma USA-p – ilisimatusartut angusaat pisortatigoortumik akueriumasimanngilaat.
- Aaqqiissutissamik maannakkorpiaq tikkuagassaqanngilaq. Amerlanertigulli ajunaarnersuarmik pisoqaraangat aatsaat pimoorussamik suliniartoqalertarpoq. Maannamullu takusavut naammassimagunanngillat, annertunerulissaqqaarpulli, Sebastian Mernild oqarpoq.
AAMMA ATUARUK Sila pillugu ajornartorsiutivut aqagu nalaassinnaavasi