Eqqugaasinnaasut: Sila pillugu ajornartorsiutivut aqagu nalaassinnaavasi
Nunat pineqartut Naalagaaffiit Peqatigiit silap pissusia pillugu Polenimi Katowicemi COP24-mik taallugu ataatsimeersuarneranni taama oqarput.
- Naalagaaffiit piuneerutsinneqarsinnaasut sinnerlugit oqaaseqarpugut, soorlu uagut nunarput, Manerassuup kippasinnerusortaanni qeqertaaqqat Marshall Islandsip præsidentia Hilda Heine oqarpoq.
AAMMA ATUARUK Silap pissusiata allanngoriartornera innuttaasut ernumanartoqartikkaat
Nunat silap pissusiata allanngoriartornerata akiorniarneqarnerani iliuuseqanngippallaartut taassuma mianersoqqussuteqarfigai:
- Nunat piuneerutsinneqarnissamut aarlerisut maanna suliassaat, nunat allat siunissami suliassarilersinnaavaat, præsidenti oqarpoq.
Silap pissusiata allanngoriartornerata akiorniarneqarnissaanut Parisimi isumaqatigiissummi anguniarneqartut tigussaarpianngitsut Polenimi ataatsimeersuarnermi piviusunngortinniarneqarput.
AAMMA ATUARUK Verdensbanken silap pissusinut suliniutit pillugit sakkortuumik oqaaseqartoq
Katowicemili isumaqatiginninniarnerni maannamut angusat, qeqertaaqqat kattuffiata siulittaasuata Mohamed Nasheedip, qeqertaaqqani Malidivernemi siornatigut præsidentiusimasup, naammaannartuunerarpai.
Taassuma USA, Rusland, Saudi-Arabia Kuwaitilu appisaluuppai:
- Tusarnaanngilluinnarput, Nasheed oqarpoq
COP24-p Katowicemi aqagu tallimanngornermi naammassinissaa naatsorsuutigineqarpoq, naammassiniapiloornissaali aamma naatsorsuutigineqarluni.