Silap pissusiata allanngoriartornera innuttaasut ernumanartoqartikkaat
Misissuinermut peqataanissamut qaaqqusissutit 1400-t nassiussuunneqarput, taakkunanngalu 606-it akineqarput ilisimatusartunillu katersorneqarlutik. Greenland Perspective Survey, illoqarfinni nunaqarfinnilu assigiinngitsuni 13-ini aasaq misissuivoq.
Misissuinermilu paasiniaaffigineqartut ilaat tassaavoq silap pissusiata allanngoriartornera qanoq isumaqarfigineripput.
Tamannalu amerlaqisunit ernumanartoqartinneqartoq misissuinerup ersersikkaa, misissuinermi siuttut ilaata, Kraks Fondimi illoqarfiit pillugit ilisimatooq, KU center for social data Sciencemi Ph. D.-nngorniartup Kelton Ray Minorip oqaatigaa.
- Misissuinitta takutippaa Kalaallit Nunaanni innuttaasut quliugaangata qulingiluat isumaqartut silap pissusia allanngoriartortoq. Quliugaangatalu arfineq-pingasut silap pissusiata allanngornera nammineerlutik malugisimagaat. Soqutiginarnerpaarli tassaavoq quliugaangata sisamat isumaqarmata silap pissusiata allannguutai imminnut ilaquttaminnullu ajoqutaassasut, quliugaangatalu ataasiinnaq isumaqartoq iluaqutigisinnaassallugit, Kelton Ray Minor oqarpoq.
AAMMA ATUARUK Kalaallit Nunaanni innuttaasut siunissaq pillugu isummersorsinnaapput
Silap pissusiata allanngoriartornera innuttaasut 62 procentiisa pingaaruteqartutut pingaaruteqarluinnartutulluunniit isigigaat aamma paasineqarpoq. Sunilli ernumassuteqarnerinut sumi najugaqarneq apeqqutaavoq. Iluliarmiut sermit iigartartut aakkiartornerat ernumassutigaat, Kujataamiut anorersuit sakkortusiartuinnartut ernumassutigaat Tunumiullu Sermersuup aakkiartornera ernumassutiginerpaallugu.
Ilisimatusartut apeqquterpassuamik saniatigut aamma silap pissusiata allanngoriartornerata kingunerisaanik nalaanneqartartut pillugit inunnik apersuisimapput.
- Silap pissusia siornatigut aamma allanngortarsimavoq aamma sermersuaqarnera nalaanneqarsimavoq. Tamakkuli nammineerluta unitsissinnaanngilagut, isumaqarpunngalu inuit naleqqussallaqqissuugamik tamakkununnga aamma naleqqussarumaartut, Kelton Ray Minor oqarpoq.
Ilisimatusartut innuttaasut silap pissusiata allanngoriartornera pillugu isumaannik sukumiisumik misissuinerat ilaatigut tamanna pillugu Galuppip nunarsuaq tamakkerlugu misissuinerani nunatta ilanngunneqarsimannginneranik pissuteqarpoq.
