Kalaallit Nunaanni innuttaasut siunissaq pillugu isummersorsinnaapput
Nunatsinni innuttaasut 1400-it piffissami qaninnermi allakkamik qorsummik puulimmik nassinneqarput. Taanna Greenlandic Perspectives Survey-mut ilaserinnissutaavoq.
Piffissamilu qaninnermi pulaarneqassapput. Ilisimatusartut eqimattat marluk nunatsinni sumiiffinnut assigiinngitsunut misissuinermi peqataaqquneqartut sapaatini akunnerni arfineq-pingasuni alakkaqattaarlugit peqataarusunnersut aperiartortassagaat, pilersaarusiami ilisimasartut ikiortaasa ilaat, Navarana Davidsen oqarpoq.
- Angeraangata misissuinerup pappiliartai soorunami tunniuttarpavut. Taavalu aperisarlugu qaqugu aaqqissinnaanerlugu. Apeqqutit 80-iupput, tassanilu akunnerup aatatsip missaani immersorneqarsinnaalluni, Navarana Davidsen taama oqarpoq.
Tassalu taamaalillutik apeqqutit eqqissillutik akisinnaavaat.
Ilisimatuut misissuinermi peqataasut akissutissaannut sunniuteqannginniassagamik oqaaseqarnissartik mianersuuppaat. Innuttaasulli qanga pisimasunut siunissamullu isiginninnerannik paasinninnerunissaq ilaatigut neriuutigineqarpoq.
- Kalaallit aningaasaqarnermut, politikkimut, silallu pissusaata allanngoriartorneranut misigisimasaat inuunermi nutaami siunissami qanoq naatsorsuuteqarnersut tassunga aperoslrugit, Navarana Davidsen oqarpoq.
Ilisimatusarnermi ikiorti oqaluttuarpoq.
Innuttaasut 18-ileereersimasut taamungaannartumik toqqagaapput nunatsinnilu sumiiffinnit tamaneersuullutik.
Ilisimatuut matukkut kasuttoraangamik ilassilluarneqartartut, Navarana Davidsenip oqaatigaa.
- Pulaarfigisagut amerlasuut soqutiginnittorujussuullutik qujanartumik peqataarusupput. Kisianni soorunami aamma ilaqartarput peqataarusunngitsut, taakkua soorunami ataqqivavut. Kisianni amerlanerpaartaat soqutiginnillutik saaffiginnittarput. Soqutiginnimmatalu soorunami nuannaarutigaarput, Navarana Davidsen oqarpoq.
Ilisimatuut pilersaarut malillugu nunatsinni angalallutik paasissutissanik katersinerat septembarip aqqaneq-aappaani naammassissaaq, inerniuliussaagallartullu saqqummiunneqassallutik. Misissuinerullu inerneri amerlasuunit atorneqarnissaat neriuutigineqarpoq.
- Misissuineq oqallinnerni, ilisimatusarnermi misissuinermilu sammineqartunut tunngasuni aalajangiinerni atorneqarsinnaanissaa neriuutigaarput, misissuinermi kalaallit innuttaasut sammisamut qitiusunut qanoq isumaqarnerannut tunngavoq, Greenland Perspectivemi pilersaarusiami Nuummi ataqatigiissaarisoq, Allan Peter Olsen oqarpoq.
Ilisimatusaqatigiit misissuisut tassaapput Ilisimatuut Københavnip Universitetianeersut nunatsinnilu ilisimatusarfinnit ilisimatuunut ikiortit tallimat. Greenland Perspective misissuinermik suliaqartoq Ilisimatusarfiup Københavnillu Universitetiata akornanni suleqatigiinneruvoq.
Illoqarfiit nunaqarfiillu tikinneqartussat aappaluttumik nalunaaqutsersorsimapput.
