VIDEO Silaannaap ujaraanik takunnittut tupaallassimaqisut

Filippus Karolussen aamma Lars Knudsen taassumalu pania, silaannaap ujaraata nakkariartortup Qaqortumi arfininngormat unnukkut qilak qaammaallatsimmagu pinngortitamik misigisamik aatsaat taama tupinnartigisumik misigisaqarput.

Allattoq Jørgen Semionsen, Camilla Dam

decembarip 16-at 2014 13:03

- Taava qaammaallappoq. Taamatullu pisoqariartoq paniga tupallalluni qissaserpoq, taamaammi aamma taassuma isigaa. Aatsaat taamatut takusaqarpunga, aamma qanippaseqaaq, Lars Knudsen oqaluttuarpoq.

- Qaammaallannera sakkortuupilussuuvoq, isigisinnaasara tamarmi qaammaallatsinneqarpoq, Filippus Karolussen KNR-imut oqaluttuarpoq.

Aamma atuaruk Kujataani unnukkut qilak qaammaallarujussuartoq

Eqqaminiittut silaannakkoortumik takusaqarsimallutik qisuariaataat aamma maluginiarsimavai.

- Takunnittut allat tusaavakka oqartut, kaar, takoriassagissi.

- Qummut qiviarama ikuallattutut isikkulik qalipaatigissumillu pamiuusalik ingerlaartoq takuara, ammut ingerlaarpoq qorsummik qungujortumillu qalipaateqarluni. Nunamut qanilligami aatsaat qamippoq, Filippus Karolussen oqarpoq.

Aamma atuaruk Silaannaap ujaraa Qaanaameersoq allamut nuukkallaleraat

Taakku marluullutik isiginnaagartik assut alutorsaatigaat.

- Erseqqaarissumik qaammaallappoq nunalu tungujuaartumik qaammaallatsillugu. Issariarnerit marluk qaangiummata tamarmi ersigunnaarpoq.

- Tarrereersoq minutsit marluk qaangiummata nunamut tukkunarluni qanngorpallappoq. Aamma sajuppillatsitsinera malugaarput, Lars Knudsen oqaluttuarpoq.

Danmarkimi Naturhistorisk Museumimi ilisimatuut silaannaap ujaraanik assiliisoqarsimassappat, minnerunngitsumillu silaannaap ujaraanik nassaartoqassagaluarpat, taakku attaveqarfigerusuppaat.