Kujataani unnukkut qilak qaammaallarujussuartoq

Qaqortormiut ilaat arfininngormat unnukkut aqqarngup missaani qaamasumik sakkortuumik illoqarfiup avannaaniittumik takusaqarput. Issariarnerni arlalinni nuna qaammartinneqarpoq, qanngorpallannermillu malitseqarluni.
Assi © : NASA, 2011
Allattoq Karsten Sommer
decembarip 15-at 2014 06:42
Nutserisoq Elisa Isaksen

Kujataani politiit pisortaat Bent Ole Kleist, qaamanermik takunnittut ilagaat. Suna takusimaneraa tassunga apeqqutigaarput.
 
- Tassa qimmeq aneerullugu silamiinninni avannamut ingerlatillunga, tassanngaannaq aput tungujortikkami, tassa sakkortoorujussuarmik qulaaninngaanniit seqerneqarami. Qaamaneq avannaatunginnit kitaaninngaanniit kangimut ingerlagami. Paasivara ullorissap anarisimassagaa, tassami sakkortoorujussuarmik qaammartitsigami, sekuntillu marluk-pingasut qaammartitsigami, avannaa'tungitsinnullu nakkariartortutut illuni aanngarluni, Bent Ole Kleist oqarpoq.
 
- Takugakku ingerlatiinnarlugu paasivara qummoroortartuusinnaanngitsoq. Ingerlanerami allaagami nipeqanngilluinnarlunilu, qaamaneralu sakkortuallaarujussuarami. Ingerlanerata nalaani nipeqanngeriarluni immaqa minutsi ataaseq qanngiuttoq qatitoorujuusarmik tasamani avannaatungitsinnit qanngorpallappoq. Qanngorujussuarpoq qutsissumiippalunneralu tusaaneqarsinnaalluni, Bent Ole Kleist oqarpoq.
 
Taanna aperineqarami qaamaneq qanoq sakkortutiginersoq oqarpoq, qaamanerup Tasersuup qinnguata tungaa qaammartikkaa.
 
- Tassa sivikitsukullammik qaammartivillugu qaammartippaa, tassa sakkortusimaqigami. Kisiannili qanippallaarsimanani ungasissumiissimanissaa ilimanarluni, Bent Ole Kleist oqarpoq.
 
Taanna aperineqarami allanik takunnissimasunik tusagaqarsimanersoq, akivoq takunnissimasunik oqaloqateqarsimanani, taamaattorli facebookimi arlallit takunnissimallutik qanngorpallammillu tusaasaqarsimallutik oqaluttuartut atuarsinnaasimallugit.
 
 
Nunatsinni ullorissap anaanik angisuumik kingullermik misigisaqartoqarpoq 1997-imi decembarip qulingiluaanni.