Sila pillugu isumaqatigiissut sivitsorpaat
Silap pissusaa pillugu isumaqatigiissuteqarnermi Kyoto-mik taaguuteqartumi nunat ikittuinnaat isumaqatigiissuteqarput.
Nunat angisuut mingutsitsinerpaasut tassalu Kina aamma USA-mi isumaqatigiissumi ilanngillat. Silap pissusaa pillugu ataatsimersuarnermit amerikamiut oqariartuutaat imaappoq.
- Erseqqisaatigissavara isumaqatigiissummi oqaasertaliullugit allaneqarsimasut USA ajornartorsiuteqarmat tamanna uagutsinnut akuersaarneqarsinnaanngilaq, silap pissusaa pillugu ataatsimeersuarnermi USA-mit aallartitaq oqarpoq.
Silap pissusaanut nukissiuuteqarnermullu danskit ministeriat Martin Lidegaard isumaqatigiissummut pakatsissuteqarpoq.
Nunat EU-mi ilaasortat nunanut siuarsagassanut silap pissusaanut ikiuinertik ukiuni aggersuni annertusiniaraat nunat nunarsuarmi pisuunerusut aningaasaliisarnertik annertusiniarnagu aalajangersimapput.
- Pakatsinarpoq nunat siuarsagassat silap pissusaanut atugassaannik aningaasanik amerlanerusunik peqanngimmmat. Taamaammat isumaqatigissutigineqartoq pakatsinarpoq, Martin Lidegaard oqarpoq.
Kalaallit Nunaanni silap pissusaa pillugu oqartussaasup Naalakkersuisunut ilaasortap Jens B. Frederiksen-ip isumaqatigiissutigineqartoq aamma pakatsissutigaa.
- Nunat anginerit ilaat annertuumik mingutitsisartut isumaqatigiissummi peqataarusussimannginneriat uggornarpoq, taakkuuppullu allanut akileeqataanissaminnut tunuarsimaarsimasut, Jens B. Frederiksen oqarpoq.
Danmark aamma EU akileeqataanissamut peqataarusussimagaluarput.
Jens B. Frederiksen Qatar-imi silap pissusaa pillugu ataatsimeersuarnermi peqataaqqammerpoq naalagaaffeqatigiit aallartitaattut ataatsimeeqataalluni.
Silap pissusaa pillugu isumaqatigiissutigineqartoq ukiuni tulliuttuni ineriartortinneqarnissaanut tunngaviliisuusoq Jens B. Frederiksen oqarpoq.
- Taanna arlaatigut iluarisimaartariaqarparput, taava ukiut tulleriit silap pissusaa pillugu ataatsimiinnissani COP 19-mi aamma COP 20-mi isumaqatigiissutinik ilassuteqartoqarsinnaassasoq, Naalakkersuisunut ilaasortaq Jens B Frederiksen tamaatut oqarpoq.