Sikunik alapernaarsuineq amerlanernik aningaasaliiffigeqquaa
Sara Olsvigip isumaa naapertorlugu sikunik alapernaarsuineq, Issittumi angallannerulernerup kingunerisaanik aningaasanik amerlanernik pisariaqartitsivoq.
- Pisariaqartinneqarluinnarpoq silap pissusaata allanngoriartornerani sikullu aakkiartuinnarnerani, imartatsinni nakkutilliisarnerit sillimaniarnermullu upalugaarsimanissat piumasaqaataasa annertusiartuinnarneranni, sikunik alapernaarsuisut pitsaanerpaamik atugassaqartinneqarnissaat. Taamaattumik tamakku piviusunngussappata aningaasanik atortorissaarutitigullu atugassarititaasut pitsanngorsarneri annertusarneqartariaqarput, Sara Olsvig allappoq.
Tamannalu tunngavigalugu Sara Olsvigip silap pissusaanut ministeri qinnuvigaa nassuiaaqqullugu, timmisartut qulimiguullillu atorlugit sikumik alapernaarsuineq aningaasaliinikkut siunissami qanoq qulakkeerneqarsinnaanersoq, tamannami qaammataasanit assiliinerup saniatigut, Nunatta imartaani sikunik ilimasaarinermut pisariaqartuummat.
Tamassuma saniatigut aamma nassuiaaqquaa, DMI-p sikunik alapernaarsuiviata aningaasaliiffigineqartarnera ukiuni qulini kingullerni qanoq isikkoqarsimanersoq.