SIK: Sullivinnik nakkutilliineq ersarissoq amigaataavoq

Nunatta suliffeqarfinnik isumannaallisaanermut aningaasat amerlanerusut atorneqassasut, Naalakkersuisut isumaqarput.

Nunattami sulliviit avatangiisiinik isumannaallisaaneq Danmarkimiit tigussappagu Sullivinnik Nakkutilliisoqarfimmut missinngersuutit naalakkersuisut qaffanniarpaat.

Pilersaarullu SIK-mit taperserneqarpoq.

Nunatsinni sullivinnik isumannaallisaanermut akisussaaffik Nunatta tigussappagu tunngavitsialak ataasiinnaasoq SIK-mi siulittaasoq Jess G. Berthelsen isumaqarpoq.

- Suliffeqarfinnik nakkutilliineq ersarissoq pisariaqartipparput, Jess G. Berthelsen KNR-imut oqarpoq.

Naalakkersuisunilu tamanna aamma pilersaarutaavoq.

Nassuiaasiaq nutaaq naapertorlugu Nunatta sullivinni isumannaallisaarnermik akisussaaffik tigussappagu Sullivinnik Nakkutilliisoqarfimmut missinngersuutit 4 millionit koruunit missaannik ukiumut qaffassapput.

Taamaalillunilu Sullivinnik Nakkutilliisoqarfimmut missinngersuutit 10,5 millionit koruunit missaanniilissallutik, tamannalu aalajangiisuulluinnassasoq, SIK-mi siulittaasoq isumaqarpoq.

- Sullivinnik nakkutilliineq amerlanerusunik aningaasaliiffigineqarnissaa pisariaqavippoq. Taamaasippallu issarinnerulissasoq ullumikkorninngaanniillu malunnaateqarnerusumik nakkutilliilissasoq neriuutigaara, SIK-p siulittaasua oqarpoq.

Sullissineq pitsaanerusoq

Sullivinnimi nakkutilliineq danskinit ullumikkut tigummineqarmat aqukkuminaatsorujussuuvoq.

- Aningaasarparsuit angalanernut atorneqartarneri ajornartorsiutaavoq. Massakkullu sullivinnik nakkutilliinermut aningaasaliissutigineqartartut sineriatsinni naammaginartumik nakkutilliinissamut amigarlutik, taamaammat amerlanerusunik aningaasaliiffigineqarnissaa pisariaqavippoq, Jess G. Berthelsen oqarpoq.

Nunatta akisussaaffik tigussappagu ukiut tallimat qaangiutsinnagit Sullivinni Nakkutilliisut Nunatsinni suliffeqarfinnut tamanut angalaarnissaat pilersaarutaavoq.

Tamannalu SIK-mit nuannaarutigineqarpoq. Taamaakkaluartorli suliffeqarfiit akitsuutitigut sullivinni nakkutilliinermut Nunatta karsianut akiliutissanut akiliisuutinneqarnissaat siulittaasup tapersinngilaa.

- Sulisitsisut akiliisussanngortinneqarpata taava tamanna atuisunut kingunerlussinnaanera ernumatigaara, SIK-p siulittaasua Jess G. Berthelsen oqarpoq.

Nassuiaaseq naapertorlugu, nakkutilliinermik alakkarterinernut kiisalu pisortaq ulloq tamakkerlugu sulisussaq allaffissornermilu sulisussamik allamik atorfinitsitsinernut Sullivinni Nakkutilliinermut missingersuutit qaffassutigisaat atorneqassapput.

Nunatta sullivinni avatangiisinik nakkutilliineq Danmarkimiit tigussappagu pilersaarusiornera Sullissisut isornartorsiorpaat, isumaqarpummi tamanna tunngavigalugu suliffeqarfinni isumannaallisaaneq pitsaanerulernavianngitsoq.