SIK-p Siumut ´issoqannginnerarai´ IA-mullu isornartorsiuilluni

Narsap eqqaani Kuannersuarni aatsitassarsiornermut suliniutip oqallisigineqarnera innuttaasunik ataatsimiititsinerit siulliit pilersaarutigineqarnerinit sakkortusiartuaarpoq.

Kuannersuit uranitaqarmata tassani aatsitassarsiorniarneq isummanik akerleriiffiuvoq. Taamaammat oqallinneq isumaqataanermut isumaqataannginnermulluunniit tunngassuteqarnerupput, innuttaasunullu ataatsimiititsinissat coronavirusimut atatillugu killilersuinerit pissutigalugit kinguartinneqassanersut maanna oqallisigineqarpoq.

Ataatsimiititsinerit kinguartinneqartariaqartut ilaatigut Siumup siulittaasuata tullia Vivian Motzeldt oqarpoq.

AAMMA ATUARUK Kuannersuit: Siumup innuttaasunut ataatsimiititsinerit kinguartikkusukkai

Ilaatigullu tamanna pissutigalugu SIK-p siulittaasuata, Jess G. Berthelsenip Siumumit politikerit ´issoqanngitsutut´ taavai. Tusagassiuutinut nalunaarummi "Politikerit issoqanngitsut"-mik qulequtalimmi ima allappoq:

- Assorsuaq tupaallaatigaara maanna partii Siumut Kuannersuarni aatsitassarsiornissamik pilersaarut pillugu tusarniaanernik kinguartitseqqusisunut ilanngulluni nalunaarmat.

Taassuma kujataani innuttaasut suliffissaaleqinerat immikkut tikkuartorpaa, taakkullu amerlanersaat SIK-mi ilaasortaallutik.

- Imaanngitsoq suliffissaq nutaaq pineqartoq taamaallaat Narsami suliffissaqartitsissammat, kisiannili nunarput aamma ataatsimut isigalugu annertuumik suliffissaqartitsisussaammat aningaasarsiorfiullunilu, Jess G. allappoq.

AAMMA ATUARUK Doris J. Jensen Kuannersuarni CO2-mik aniatitsisinnaanermut: Toorneriinnaavoq

Taassuma aamma nunatsinni partiini illuatungiliuttut annersaat Inuit Ataqatigiit, uranitalinnik piianissamut akerliusut isornartorsiungaatsiarpai.

- Inuit Ataqatigiit politikkeraat nunatsinni uranimik akulimmik piiaasoqassanngilluinnartoq. Imaappoq 100-riarluniluunniit paasisitsiniaasoqaraluarpat suli paasisitsiniaasoqarnissaanik Inuit Ataqatigiit piumasaqartuassapput, Jess G. Berthelsen tusagassiutinut allappoq.