Kuannersuit: Siumup innuttaasunut ataatsimiititsinerit kinguartikkusukkai
Nunatta kujataani innuttaasunut Kuannersuarni aatsitassarsiornissamik suliniut pillugu ataatsimiititsinissat kinguartinneqassapput.
Siumup siulersuisuuneri taama isumaqarput. Innuttaasunulli ataatsimiititsinerit sapaatip-akunnerata tulliani aallartittussaaneri ajornartorsiutaavoq.
Innuttaasunut ataatsimiitsitsinissat unitsinneqarnissaat naalakkersuisut maanna aalajangiiffigisussanngoraat, Siumumi siulittaasup tullia, Vivian Motzfeldt siulersuisuunerit sinnerlugit KNR-imut oqarpoq.
AAMMA ATUARUK Doris J. Jensen Kuannersuarni CO2-mik aniatitsisinnaanermut: Toorneriinnaavoq
- Tassa taamatut kissaateqarpunga ullumikkut peqqussutit atuuttut aammalu innuttaasut katersuussinnaanerani killilersuutit piuneranni, takusinnaavara innuttaasut tamarmik periarfissinneqarnavianngittut tusarniaanerani ingerlanneqarnerani peqataanissaminnik.
Kuannersuarni aatsitassarsiorfik pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfik: Pinngortitaleriffik aamma Nationalt Center for Miljø og Energi, IPN-iliaq.
- Taamatullu oqariartuuteqarnerput ilisimatitsissutigissavara, uannit kisimi pinngimmat, kisiannilu Siumup siulersuisuuneri tamakkiingajattoq ataaseq kisiat pinnagu, taamatut oqariartornissamik aalajangersimavaat.
Taanna kinaanersoq Vivian Motzfeldtip oqaatigiumanngilaa.
- Ullumikkut paasititsiniaaneq taamatut ingerlatillugu isumaqanngilanga inuit katersuuffissaqassasut, tunngavissaqartarpugummi aatsaat aalajangiisinnaassuseqalerlutalu naammattumik paasissutassanik pajuttorneqarsimagaangatta.
Nunaqavissut tusaaneqarlik!
Innuttaasunulli ataatsimiititsinerilli tallimanngorpat sapaatip akunnerata tulliani aallartittussaapput. Qanoq iliorniarpisi?
- Isumaqarpunga taamatut oqartornerput tusaaneqartariaqartoq aammalu minnerunngitsumik kujataani qinikkat tamarmik atsioqatigiillutik taamak kissaateqarnerat isumaqarpunga tusaangitsuusaasallugu avaqqukkuminaattorujuusssoq.
- Kujataani qinikkat ataatsimoorlutik nalunaaruteqarnerat taanna avaqqutiinnassallugu pissusissamisoortutut isiginanngilaq.
AAMMA ATUARUK Naalakkersuisoq: Kuannersuarni seernartulinnik kinitsivik isumassarsiatsialaavoq
Peqatigiiffiit, innuttaasut sumiiffimmilu politikerit qassiiusut ataatsimiinnerit kinguartinneqarnissaat kissaatigaat. Inuit ataatsimiinnermut peqataasinnaasut corona pissutigalugu killilersuinernit killilerneqaqqanerat ilaatigut pissutaasoq, tunngavilersuutigineqarpoq.
Inuit illup iluani katersuussinnaasut 100-init amerlaneroqqusaanngillat – aamma inip isersimaffiusussap inoqarsinnaassusaata affaannaat isersimaqqusaapput.
Kommune Kujallermi akerlilerneqartoq
Kommune Kujallermi politikerit qassiiusut sapaatip akunnerata siuliani qisuariarput. Benjamin Kielsen Siumumeersoq taakku ilagaat.
Taassuma najukkamini akerliliinerit pissutigalugit isummaminik allanngortitsinissani aalajangerpaa.
- Taakku oqarput aatsitassarsiorneq aallartissappat taava maani nunaqarusunngillat. Allamut nuussapput, taanna oqarpoq.
Gruppip siulittaasua, Karla Egede Bisgaard suliniummut tunngatillugu aamma tunuarsimaarpoq.
- Sammisamut taama imaanaanngitsigisumut tusarniaaneq inuit amerlanerpaat peqataaffigisariaqarpaat. IA sinnerlugu qinigaq Stine Egede oqarpoq.
AAMMA ATUARUK Kujataani Siumumeersup Kuannersuarnut suliniut tapersersorunnaaraa
Innuttaasunut ataatsimiititsinerit februaarip ulluisa tallimaanni aallartinneqarnissaat pilersaarutaavoq. Narsarsuarmi, Igalikumi, Narsami Qaqortumilu innuttaasunut ataatsimiititsisoqassaaq.
Tusarniaanerit angalasinnaanermut killilersuutit pissutigalugit ataasiarlutik kinguartinneqareernikuupput.
KNR-ip aatsitassanut naalakkersuisoq, demokraatineersoq, Jens-Frederik Nielsen oqaaseqartinniarsaraa.
Taassuma innuttaasunut ataatsimiititsinissat tallimanngormat taamaatiinnarneqassannginnerarpai.
Innuttaasunut ataatsimiititsinissamut pissaliussat:
