SIK-p nunatta eqqartuussisuunera eqqartuussivimmut tunniuppaa

Sulinermik Inuutissarsiuteqartut Kattuffiata SIK-p Nunatta eqqartuussisuunera Søren Søndergård Hansen, sulisartoqarnermut tunngasunik eqqartuussivimmi kattuffiup aamma Sulisitsisut Peqatigiiffiata saqitsaassutaannik suliarinniffiusumi illuinnaasiorsimannginnersoq aalajangiiffigitinniarlugu eqqartuussivimmut tunniussivoq, taama aviisi Sermitsiaq allaatiginnippoq.

Allattoq Louise M. Kleemann

maajip 09-at 2008 06:59

Nuup eqqartuussiviani eqqartuussisup Mille Søvndahl Pedersenip sulisartut kattuffiata nunatsinni eqqartuussisuunermik eqqartuussivimmut tunniussisimanera uppernarsarpaa.

- Suliassaq Nunatta Eqqartuussivianut ingerlateqqinneqarpoq, suliassamullu tunngatillugu eqqartuussisuusussamik Danmarkimiit aggersaasoqassaaq, eqqartuussisoq oqarpoq.

Eqqartuussisoq suliassamut attuumassuteqarpallaaraangat eqqartuussisuusussamik allamik ivertitsisoqartarpoq.

SIK-p suliassanngortitaa tassaavoq sulisartut eqqartuussivianni eqqartuussisuunerup marsip 14-ianni aalajangigaa. Taamani SIK kattuffiup aamma Sulisitsisut Peqatigiiffiata isumaqatigiissutaannik pingaarnermik unioqqutitsisimasutut SIK 800.000 koruuninik akiliisussanngortinneqarmat.

SIK isumaqarpoq eqqunngitsumik tunngaveqarluni akiliisussanngortitsisoqartoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.