SIK-p kommuunit pisuutippai

Tamannali Qaasuiutsup Kommuniani suliffissaqartitsiniarnermut immikkoortortoqarfimmit ilisarineqarsinnaanngilaq.

Taakkua isumaqarput aalisakkanik suliffissuit sulisussanik pisariaqartitsinerminni kommuuninut attaveqarnerat pitsaanerusariaqartoq.

Jess G. Berthelsen tamanna pillugu ima oqarpoq:

- Tassa ajornartorsiutaavoq suliffissarsiuussisarfinni maannakkut sulisut ikippallaarnerat. Tassami suliffissarsiuussisarfiit ajuusaarnaraluartumik maannakkut imatut pissusilersortarput soorlulusooq stempelertarfittuinnaq annertunerusumik atorneqarlutik, Jess G. Berthelsen oqarpoq.

Tamannali suliffissarsiuussisarfimmit ilisariuminaatsinneqarpoq:

- Taanna uppernarsaruminaatsippara. Kisianni suliffeqarfiit suliffissarsiuussisarfinnut attaveqartarnerat amigarnerusutut isiginiarsinnaavara, Thora Siegstad, Qaasuitsup Kommuniani suliffissarsiuussisarfinni pisortaq oqarpoq.

Qasigiannguani aalisakkanut suliffissuarmi sulisussat 30-it missaaniittut juunip aallartisimalernerani amigaatigineqarmata, illoqarfimmi suliffissarsiuussisarfik suleqatigalugu Qasigiarmiut 20-it Kangaatsiallu eqqaamiut qulit sulisinneqalerput:

-Taavalu aamma juunip ingerlanerani angerlartitsisoqarnikuuvoq tunisassiassaaleqineq pissutigalugu. Kingusinnerusukkullu inuit taakkoqqinnaat suliartoqqusaapput. Taamaalilluni aamma inunnut eqquisarpoq. Nalusarpaammi ullumi sulissanerlutik imaluunniit ulapputissanerlutik, Thora Siegstad oqarpoq.

Avannaani illoqarfiit ilaanni aalisakkanut suliffissuarni aasaanerani sulisussaaleqilertarneq akiorniarlugu SIK aamma Royal Greenland aggustip qaammataani naapeqatigiittussanngorput.

- Taamaattumik Royal Greenlandilu isumaqatigiippugut sumiiffinni ataasiakkaani taamatut aasaanerani sulisussaaleqisarneq peqqutigalugu oqaloqatigiittoqartariaqartoq Royal Greenlandip SIK-llu akornanni qanoq iliuuseqartoqarsinnaanersoq, SIK-p siulittaasua, Jess G. Berthelsen oqarpoq. Taassuma neriuutigaa oqaloqatigiinnermi  aappaagu taamatut pisoqaqqinnginnissaa anguneqarsinnaassasoq:

- Tassani sunarpiaq ajornartorsiutip qiterineraa paasiniassavarput, taavalu tamatuma kingorna aamma suliffissarsiuussisarfiit aamma attaveqarfigineqassapput. Neriuppugullu taamatut pingasuulluta arlaatigut aaqqiissuteqarsinnaajumaarluta aappaagumut taanna ajornartorsiut takkuteqqissanngippat, Jess G. Berthelsen oqarpoq.