Naak aningaasarsianut qaffaatit? SIK-p immikkoortortaqarfii utaqqikatapput
SIK Namminersorlutik Oqartussallu aningaasarsiat pillugit februarip 19-anni isumaqatigiissummik atsioqatigiipput. Taanna naapertorlugu ilaasortat agguaqatigiisillugu akissarsiaat 2 koruunit 15 ørenillu qaffaassapput. Taakkualu immikkoortortaqarfiit takorusulerpaat.
- Tassa utaqqikatapput, siornali aallartinnikuugami isumaqatigiinniarneq ukioq manna februari tikillugu, Maniitsumi SIP-ip siulittaasua Elisabeth L. Hansen oqarpoq.
AAMMA ATUARUK Isumaqatigiinniarnerit suli ingerlanneqartut
Taassuma ilaasortaasalu naammagittarsinnaajunnaalernerat Uummannami immikkoortortaqarfimmiit isumaqatigineqarpoq.
- Utaqqikatapput, apersuisarput isumaqatigiissut qaqugu piariissanersoq, Uummannami SIP-ip siulittaasua Jokum Zeeb oqarpoq.
Upernavimmi Nanortalimmilu immikkoortortaqarfiit siulittaasuisa aamma ilaasortat, killiffik paaserusulerpaat. Taakkua tusarusulernerattulli Maniitsumi tusarusulerput.
- Nalulluinnarpara sumut killinnersoq, tassa taakkua tigusinikuupput suliassaminnik taavalu ulloq manna tikillugu suli tutsiuttoqarani, Elisabeth L. Hansen oqarpoq.
Namminersorlutik oqartussani isumaqatigiissutit pillugit allaffimmi pisortaq André Guttesen isumaqatigiinniarnerit pillugit KNR-imut oqaaseqarumanngilaq, suliarli ingerlanerarpaa.
SIK-p immikkoortortaqarfiisa utaqqikatannerannut siulittaasoq paasinnippoq, utaqeqqilaaqqusillunili.
- Tamatta utaqqikatappugut, kisianni tassa SIK-mut tunngatillugu SIK-minngaanniit pingaarnerpaajutipparput torersumik pitsaasumillu taakkua naammassineqarnissaat, Jess G. Berthelsen oqarpoq.
SIK sinerissami 25-inik immikkoortortaqarfeqarpoq, Nunatsinnilu sulisartut 10.000-it missaanniittut aningaasarsiaat atugaallu pillugit isumaqatigiissuteqartarluni.