Qulaarpaa Uranimik avammut nioqquteqarnissaq SIK-ip kissaatigigaa
Urani avammut nioqqutigineqassaaq uranitalinnillu killilersuinissamik isumassarsiat tamaasa qimanneqartariaqarput. Sulinermik inuussutissarsiutillit kattuffianni SIK-mi siulittaasoq, Jess G. Berthelsen, taama isumaqarpoq.
- Neriuutigeqaara upperalugulu, Kuannersuarni piiaavimmik ukiut pingasut sisamalluunniit qaangiuppata ammaasoqarumaartoq. Nunatsinni suliffippassuarnik pilersitsisinnaavoq ineriartornermillu aamma kinguneqassalluni, SIK-p siulittaasua Jess G. Berthelsen KNR-imut taama oqarpoq.
Uranimik avammut nioqquteqarnermi periarfissarpassuit takusinnaanerarpai.
Urani niuerutigerusukkaa
- Uranip niuerutigineqarsinnaanera aamma misissortariaqarsoraara.
Urani pillugu apeqqutip nunatsinni innuttaasut akornanni avissaartuussutigineqarnera qularutissaanngilaq.
SIK-lli siuttuata uranimik avammut nioqquteqarnissaq isumatusaarnerussasoraa. Allaammi isumaqarpoq nunarsuarmioqatigiinnut iluaqutaasinnaassasoq.
- Atomip nukinganik, tassalu minguitsumik nukissiuuteqarnermik, atuisut urani Australiami Canadamilu pissariarissaqqaarpaat. Uagulli nukimmik minguitsumik nunarsuarmillu minguinnerusumik pilersitseqataasinnaagutta, tamanna misissortariaqarsoraara.
Qummut killiliisoqarnissaa kissaatiginngilaa
Taamaammat Jess G. Berthelsen qulanngilaq. Uranitalinnut qummut killissamik eqqussineq kukkunerussaaq.
- Qummut killiliinissamik oqalunneq qimavissortariaqarsoraara. Saffiugassanimmi qaqutigoortunik annertuumik nassaassagaluarutta qanoq-iliussagatta? Taava taakku qallornagit isiginnaaginnassavagut? Taamaammat isumaqarpunga qanoq uranitaqartigeqqusaaneranut killiliinissaq navianalaassasoq, Jess G. Berthelsen taama oqarpoq.
