Qulaarpaa SIK: Amigartooruteqarluta ingerlaniarta
![SIK, Jess G. Berthelsen](/sites/default/files/styles/image_934x467/public/article_images/jess_g._berthelsen_2.jpg?itok=LWZteeIP)
Aningaasat nunatta karsianit aniaannavipput. 50 millionit koruuninik amigartooruteqassangatinneqartoq 225 millionit 240 millionillu akornanniissasoq maanna nalilerneqarpoq.
Siunissami aningaasartuutit amerligaluttuinnassapput, maannakkutullu inissisimasoqartillugu isertitat malinnaasinneqarsinnaassanngillat.
Aarlerinarpaluppoq, siunissamulli aamma isumalluartoqarpoq.
Ajunngitsumik ingerlasoqarpoq
- Maannakkut tassa amigartoortussanngorlugu inissinneqarpoq uanga isumaqanngilanga ilaasortatsinnut taanna ajortumik attuissasoq minnerunngitsumik ukiut pingasut qaangiuppata, imaluunniit ukiut sisamat qaangiuppata taamatut sinneqartoortussanngorluni inissikkaanni, SIK-mi siulittaasoq Jess G. Berthelsen taama oqarpoq.
Naalakkersuisut aningaasanut inatsimmi amigartooruteqarlutik ingerlanissamut piumassuseqarnerat nuannaarutigaa.
- Massakkut aningaasanut inatsisissaq amigartoortussanngorlugu 70 million missaannik siunnersuutigineqartussaavoq, SIK-minngaanniit oqaatigiuarparput pingaarnerunngilaq aningaasanut inatsisissap sinneqartoornissaa isumarput naapertorlugu aningaasanut inatsisissatut siunnersuuteqartoqarsinnaavoq ukiuni siullerni pingasuni amigartoortumik ukiuni tulliuttuni tallimani imaluunniit qulini sinneqartoortussanngorlugu inissikkaanni.
- Tassanilu eqqarsaatigineqartariaqarpoq ilaasortatta massakkut atugaat taamaattumik isumaqarpunga taakkua atugaat pingaarnerutillugit aningaasaqarnermut inatsisiliortoqartariaqartoq, Jess G. Berthelsen taama oqarpoq.
Killissaa nakkutigilluartariaqarpoq
Aningaasaqarnermut Siunnersuisooqatigiit siulittaasuata Torben M. Andersenip ukiualunni amigartooruteqarluni ingerlasoqarsinnaanera erseqqissaatigaa, killingali nakkutigeqqissaartariaqarsoralugu.
- Amigartooruteqarluni ingerlasoqareerpoq 2014-imilu aamma amigartooruteqartoqarluni. Taamatut ingerlatsinissamut killissaq qanittuararsuuvoq, iluarsartuusseqqinnissallu inissinneqanngippata killissaa qanilliartuinnaassaaq, maannakkut siunissamilu amigartooruteqarluni ingerlasoqassammat.
- Taamaattoqarneratigullu amigartooruteqarluni ingerlatsineq aningaasalersoruminaassinnaavoq, Torben M. Andersen taama oqarpoq.
Iluarsartuusseqqittoqanngippat sinneqartooruteqartoqarnavianngilaq
Ajornartorsiutaasormi tassaavoq, iluarsartuusseqqittoqanngippat nunatta siunissami aningaasaqarnera nalaatsornikkuinnaq pisut tunngavigalugit qulakkeerniarneqassammat. Aamma amigartooruteqarluni ingerlatsinikkut aningaasanik taarsigassarsiniarnissaq ajornakusoortuuvoq.
- Iluarsartuusseqqittoqanngippat aningaasatigullu atalluarsinnaasunik siunnerfiliisoqanngippat, taava aningaasaqarnikkut politikki taama ittoq ingerlakkuminaattupilussuussaaq, ukiunimi ingerlalluarfiunngitsuni aningaasanik taarsigassarsinikkut ukiuni ingerlalluarfiusuni taakku taarserneqartussaassammata, taamatullu aningaasaqarnikkut politikkimik ingerlatsineq nalorninaateqartupilussuuvoq, Torben M. Andersen oqarpoq.
Innuttaasut ajunngitsumik atugassaqartinnissaat pingaarneruvoq
Jess G. Berthelsenilli aamma erseqqissaatigaa amigartooruteqartuarluni ingerlatsisoqarsinnaanngitsoq.
- Soorunami ukiuni tulliuttuni tallimani amigartuuinnavissumik taamatut aningaasat inatsisiliortoqassappat taava ernumanartoqassaaq kisianni naliginnaasumik niueriaatsit aallaavigalugit ukiuni pingasuni amigartoorneq taanna akuerineqarsinnaasarpoq, taamaattumik uanga ernumanartorujussuartut isiginngilara illuatungaatigullu pingaarnerutippara ilaasortatta ulluinnarni atugaasa eqqumaffigineqarnerulernissaat, Jess G. Berthelsen oqarpoq.