SIK: Akitsuutinit nutaanit ilaasortavut eqqorneqassapput
Cigaretsit, imigassaq, sukkut, sukkulaatit mamakujuttullu akitsuutissanniit nutaanit isertitassat annerpaartaat SIK-mi ilaasortanit aaneqassapput.
- Akitsuutsinik taamatut ulluinnarni atukkatsinnik, tassami ajoraluartumik oqartariaqarpugut immaqa ilaasortagut taakkuninnga atuinerpaajupput. Taakkuuppullu tassa eqqorneqarnerpaajusussat, Jess G. Berthelsen SIK-p siulittaasua oqarpoq.
- Akitsuutit nutaat malillugit cigaretsit 20-t 82 koruuniniit 86,50 koruuninut akitsorput.
- Sioraasat kilo aamma taamatupajaaq akii qaffapput: 21,95 koruuniniit 26,50 koruuninut.
- Carlsbergi ataaseq 18,50 koruuniniit 19,25 koruuninut akeqalerpoq.
- Aamma mamakujuttut akisunerulerput:
- Mamakujuttut puussiaaqqat Haribomeersut, 375 grammit, 65 koruuniniit 67 koruuninut akitsorput.
- Aamma sukkulaatit mikinerit tamarmik 50 øremik akitsorput.
Taassumammi ilaasortami atugaasa ajornerulernissaat ernummatigaa.
- Tassami soorunami ulluinnarni inuuniutissaat minnerulissapput. Taamaattumik taakkunatigut ilaa akitsuuseeqqattaarneq isumaqarpunga ilaasortatsinnut annertunerpaamik attuisartoq, Jess G. Berthelsen oqarpoq.
Taamaammat ingerlatseqatigiiffiit akileraarutikinnerulernissaat, sulinermilu ilanngaatip 2020-mit atulersinnissaannut aningaasartuutigineqartussat, akitsuusersuinikkut matussuserneqartussanngormata pissusissamisoorsorinngilaa.
- Selsskabsskatti appartinniavissorunikku minnerusumik appartissimasinnaagaluarpaat taavalu taakku akitsuutit ilaatigut atuutsinngitsoorlugit, Jess G. Berthelsen oqarpoq. Taanna aamma isumaqarpoq aningaasat allaminngaanniit aaneqarsimasinnaangaluartut.
- Isumaga naapertorlugu tassa imaappoq aatsitassarsiorfiit taakkua ammassappata aningaasarpaalussuit tassanngaanniit aaneqarsinnaagaluarmata.
AAMMA ATUARUK Akitsuutinut nutaanut akerliusut: Pissakinnerusut ilungersortut eqqugaaqqipput
Naalakkersuisut partiilu tapersersortaat Demokraatit akitsuutinik qaffaanerminni inuiaqatigiit peqqinnerulernissaannut aqqutissiueqataasinnaasut neriuutigaat.
- Soorunami tamatta kissaatigaarput peqqinnerulernissaq. Kisianni ilimaginngilara taamatut iliinnarluni inuit peqqinnerulissasut. Soorunami taakkua peqqinnanngitsutut oqaatigineqarsinnaapput maannakkut taamatut akitsuusiinerit cigaretsit imigassaq ilaalu ilanngullugit. Kisianni apeqqutaavoq atuineq taakkuninnga annikinnerulissanersoq, Jess G. Berthelsen oqarpoq.
AAMMA ATUARUK Brugsenimi niuerniat akitsuutit nutaat pillugit: Silatusaarneq - sianilliorujussuarnerluunniit
Kisianni aningaasaqarnermut naalakkersuisoq Vittus Qujaukitsoq (NQ) tamatumunnga isumaqataanngilaq:
- Peqqinnanngitsut inuuniarnitsinni pisariaqartivinngisavut akitsuutini aaniarlugit aalajangerpugut.
- Tupa navianarpoq aamma peqqissutsimut ajoqutaasoq. Taamaattumik oqaannarsinnaanngilagut inuttaasut affaat pujortartarmata taava tupa attorneqassanngitsoq, Vittus Qujaukitsoq oqarpoq.
