Sheinbaum Mexicomi arnani siullersaalluni præsidentinngussagunavittoq

Mexico, nunarsuatsinni nunat spaniamiusut oqaaseqarfiusut annersaat, oqaluttuarisaanermi arnamik aatsaavissuaq præsidentitaartussanngorunavippoq. Claudia Sheinbaum - partii Morena - amerlanerussuteqangaatsiarluni ajugaassasoq taasinernik naatsorsuigallarnerit takutippaat.

TV-qarfik Nmas aviisilu El Financiero tamarmik immikkut Mexicomi qinersiviit matunerisa kingorna nalunaaquttap akunnera ataaseq qaangiuttoq taama nutaarsiassiipput.

Mexicoli arnamik præsidenteqalernissaa qinersinissaq sioqqutingaatsiarluguli ilimagineqalereersimavoq.

Claudia Sheinbaum qinersisartunik isumasiuinerni taasinerit affai sinnerlugit taaguunneqartussatut inissisimajuarsimavoq. Unammillertaalu, aamma arnaasoq, taasinerit pingajorarterutaannik aamma taaguunneqarluni.

Sheinbaum, maanna præsidentiusup Andres Manuel Lopez Obradorip aamma ilaasortaaffigisaani, partii Morenameersuuvoq.

Sheinbaum, Mexicop illoqarfiisa pingarnersaata Mexico Cityp nunami immikkoortortaani siusinnerusukkut naalakkersuisunut siulittaasuusimavoq.

Sheinbaum Mexicomi præsidentitut oktobarip aallaaqqaataani ivertinneqassasoq ilimagineqarpoq. Ukiuni tullerni arfinilinni atorfigisassamini nakuusernerit nunami ajornartorsiutaaqisut iliuuseqarfissaasa pingaarnersaraat.

Aamma USA-mut attaveqarnerit sammisaanut pingaarnernut ilaassasut allaaserineqarpoq.

Mexicomi præsidentinngortussap mexicomiut nunamut sanilerisamut USA-mut nuuttarnerat aamma sunniuteqarfiginerpaasassaasa ilagaat.

Sheinbaumip qanoq siuaqqatiginera ullap tungaagut taasinerit suli kisinneqarneranni nalunarallarpoq.