Mexico Citymi arnanut nakuusertoqartarmat tamat pisinnaatitaaffiinik atorunnaarallartitsisoqartoq
Mexico Citymi arnanut nakuusertoqartarmat tamat pisinnaatitaaffiinik atorunnaarallartitsisoqarpoq.
Borgmesteri, Claudia Sheinbaum sisamanngornermi taama oqartoq, nutaarsiassaqartitsivik, dpa allaaserisaqarpoq.
Taassuma allannguerujussuarneq ajornartorsiummik ersarinnerulersitsissasoq neriuutigaa.
- Maani illoqarfimmiittut unitsitsisariaqarput, borgmesteri nalunaarummini allappoq.
Ukiup ataatsip ingerlanerani toqutsinerit 150-it
Pisortatigoortumik kisitsisit naapertorlugit Mexico Citymi arnat 150-init amerlanerusut ukioq manna qaammatit qulingiluat siulliit ingerlaneranni toqutaapput. Taakkunannga 40-t arnaanertik piinnarlugu toqutaasimasut, oqartussat paasissutissiissutigaat.
Tamatuma saniatigut septembarip naanissaata tungaanut pinngitsaaliilluni atoqatiginninnerit 527-t nalunaarutigineqarput.
Claudia Sheinbaumip qaammarsaaniartoqarneranut atatillugu kinguaassiutitigut pinerluuteqarsimasut tamanit takuneqarsinnaasunngorlugit allattorsimaffiliortoqarnissaa inatsisissatut siunnersuutiginiarpaa.
Mexico Citymi pinngitsaaliilluni atoqateqarniarsarinerit 2018-imi oktobarimit 2019-imi oktobarimut 10 procentimik amerlisimapput.
Matumani Mexico Citymi arnat pinerliisuminnik angummik eqqartuussivitsigut suliassanngortitsinissaannut siunnersuisussanik tapersersuisussanillu arnanik eqqartuussissuserisunik amerlanerusunik tikisitsisoqarnikuunera pissutaasoq, Steinbaum oqarpoq.
2015-imit tamat piginnaatitaaffiinik atorunnaartitsinerpassuusut
Avatangiisinut ilisimatooq, 57-inik ukiulik Mexico Citymi arnani siullersaalluni ukiup ataatsip missaata matuma siorna borgmesterinngorpoq.
Illoqarfiup inuppassuaqarfiani innuttaasut 9 millionit missaanniipput, 20 millionillu sinneqartut illoqarfiit pingaarnersaani tamarmi najugaqarlutik, taamaammat mexicomiut illoqarfiisa pingaarnersaat nunarsuarmi illoqarfiit annerpaat ilagaat.
Arnanut nakuusertoqangaatsiartarnera pissutigalugu Mexicomi illoqarfiit allat 18-it assingusumik tamat pisinnaatitaaffiinik 2015-imiilli atorunnaarsitsisalerput.
Arnat politiinut akerliussutsimik takutitsisut
Mexico Citymi arnat hunnorujulikkaat aappaluttumik qaamasumik qalipaammik qillaalasunillu qalipaasersorsimallutik aqqusinertigut ingerlaaqatigiipput.
Akerliussutimik takutitsinerminni Mexicomi politiit qaammatini kingullerni kinguaassiutitigut atornerluinermut naapertuilluanngitsuliornermullu unnerluutigineqarsimasut akerliussutigaat.
Ilaatigut Mexico Citymi eqqartuussiviup politiip niviarsiaqqamik 16-inik ukiulimmik illoqarfiup katersugaasiviani pinngitsaaliisimasimalluni unnerluussaanera aallartippaa.
Nutaarsiassaqartitsivik AP taama allaaserisaqarpoq.
Suliami allami politiit sisamat niviarsiaqqamik 17-inik ukiulimmik politiit biilianni pinngitsaaliisimasutut unnerluutigineqarput.
/ritzau/