Issittumi sermip immamut atanerisa annersaat Kalaallit Nunaata avannaaniippoq. Taanna kaanngarsimavoq, aakkiartorneralu annertusiartorpasippoq.

Danmarkimi Kalaallit Nunaannilu ujarassiuutut misissuiffik GEUS taama paasissutissiivoq.

- Ukioq manna kaanngarnera tupaallannarpallaanngilaq, GEUS-imi professori, Jason Box KNR-imut oqarpoq.

- Quppaannerujussuit ukiut arfinillit matuma siorna aallartittut takoreernikuuagut, sermerlu ukiut tamaasa kaanngarnerulaartarpoq. Aasat kingulliit marluk kiangaatsiarnera iigarneranut sukkanerulersitsivoq, professori oqarpoq.

Sermeq immamut atasoq tassaavoq sikorujussuaq imaani puttasoq, kisianni sermimut iigartartumut suli atalluni.

Ilisimatuut qaammataasatigut assilisat atorlugit sermip immamut atanerisa nunatta avannaani allanngoriartornerat piffissami sikuerfiujunnaarnerani uuttortartarpaat.

Uisaallannartoq

Sermip immamut ataneri maanna kaangarsimasut Nioghalvfjerdsfjorden Gletcherip eqqaaniipput. Ukiuni kingullerni marlunni ukiumut kaanngartut 50 km2-init annertunerusut kisitsisit nutaat takutippaat.

Tamanna Joson Boxip GEUS-imi suleqataata, Niels J. Korsgaardip aamma tupaallaatiginngilaa.

- Sermip immamut atanerisa ilarujussuat kaanngartoq nakkutigigalugit uisaallannalaarpoq, kisianni Issittumi maanna ineriartortoqarnera pissutigalugu tamanna naatsorsuutigisariaqarpoq, Niels J. Korsgaard oqarpoq.

Issittumimi kianneruleriartornera nunarsuarmi tamarmi agguaqatigiissillugu kianneruleriartorneranit sukkaneruvoq.

- Imaani silaannarmilu kissarnerusoqarnera sermip imaanut atasut naqqanut qaanullu aatsitsiartorput, sermillu immamut ataneri saannerusut kaanngaqqajaanerullutik, taanna oqarpoq.

Aasat agguaqatigiissillugu kiannerusut

Jason Box isumaqataavoq. Aasat kingulliit marluk agguaqatigiissillugu kiannerupput.

- Tunup avannaa sermersuaqarnerata nalaani pissutsinut assingunerpaavoq Kalaallit Nunaannilu issinnerpaalluni. Tassani pissutsit allanut naleqqiullugu arriinnerusumik allanngoriartortarput, aasalli kingulliit marluk agguaqatigiissillugu kiassutsimit gradinik marlunnik kianneruvoq, annertuumillu aakkiartortoqarneranik takusaqareerpugut, Jason Box oqarpoq.

Sermeq immamut atasoq 160km2-imik 1999-imiilli kaanngartitsereerpoq. Tamanna New Yorkimi illoqarfissuarmit Manhattaniminngaanniit marloriaammik annertuneruvoq.