Sermiligaami kajumissaasiisoqartoq
Sermiligaami peqatigiiffilerineq nukittorsarniarlugu Sanningasoq Tungujortup aallarteqqinneqarnissaanik suliniuteqarsimanera tunngavigalugu ilaatigut kajumissaat tunniunneqarpoq.
Borgmester Asii Chemnitz Narup, maannakkut Tunumiittoq, kajumissaat tunniukkiartorlugu Sermiligaamut tikeraarpoq.
- Inuit najukkaminni akisussaaffimmik tiguserusuttut, inuiaqatigiinni ajornartorsiutinik annertoorsuarnik eqqartueqateqarnissaminnut sapiissuseqartut pisariaqartippavut. Taamaattumik Mattaani Taunâjik kajumissaammik tunisinnaagakku nuannaarutigaara, borgmester Asii Chemnitz Narup oqarpoq.
Mattaani Taunâjik suliumatuutut, innuttaasunik allanik sunngiffimmi nammineq kajumissuseq tunngavigalugu sulinissaannik kaammattuisartutut inuunermilu unammilligassat tungaasigut tunuarsimaartuunngitsutut oqaatigineqarpoq.
Ataqqinninnermik takutitsinerup saniatigut kajumissaasiinermi 15.000 koruunit tunnissutigineqarput. Kajumissaaserneqartup aappaa, Nuummi aaqqissuussisoqarnerani, tamanut nalunaarutigineqarumaarpoq.