Sermersuup suliniutaata siunertaa Simonsenip taperseraa
Kommune Kujallermi ilinniarsimasunik atorfinitsitsiniarnermi akissarsiaqartitsinerunissaq pilerinarsaataassaaq. Borgmesterip tullersortaa Simon Simonsen aasaq taama oqarpoq.
Kommuneqarfik Sermersooq Nuup avataani sulisorisaminut pitsaanerusunik atugassaqartitsinissaq maanna neqeroorutigaa, tamannalu Simonsenimit, maanna KANUKOKA-mi siulittaasuusumit isornartorsiorneqarpoq.
- Tamannali suliatigut kattuffiit attuumassuteqartut nalinginnassumik isumaqatigiinniarfiginerisigut pisariaqarpoq. Aamma Nunatsinnut tamarmut iluaqutaasariaqarpoq assigiinnillu periarfissaqartitsilluni, Simon Simonsen taama oqarpoq.
Kommunit akissaatit pillugit isumaqatigiinniarnerit avataasigut annerusumik akiliiumallutik unamminissaat aamma aarleqqutigaa.
Sermersooq akissarsiaqartitsinerunianngitsoq
KANUKOKA-lli siulittaasua paatsuugaqarsimasoq, kommunaldirektøriugallartoq Lars Møller Sørensen nassuiaavoq.
- Qaffasinnerusumik akunnermusiaqartitsinissamik allamilluunniit tunniussisoqarnissaanik oqanngilagut. Ajunngitsorsiassanik isumaqatigiissutigeriikkanik tunniussisoqassanngilaq.
AAMMA ATUARUK Kommunit Sermersuup isornartorsiorneqarnera taperseraat
Møller Sørensenillu kommunip assersuutigalugu Tasiilami sulisumut neqeroorutigisinnaasaanut assersuutitut taavaa, sulisoq suliaminut atatillugu isumassarsioriartornissamik suleqatillu Nuummiittut siunersiueqatiginissaannik Nuuliartarnissaanik ukiumut ataasiarluni neqeroorfigineqarsinnaasoq.
- Tamanna akissarsiaqartitsinerunngilaq allatigulluunniit pissarsiaqartitsinerulluni. Atorfigisap iluarisimaarnerulernissaanut aqqutissiuineruvoq. Aamma isumaqatigiissutini arlaannaaniluunniit allassimasoqanngilaq sulisorisatta suliatigut siunersiueqatigiinnissaannik kommunitut qulakkeerinnissinnaanngitsugut aammalu tamanna qanoq qulakkeerniassaneripput.
Pisariaqartitsisoqarnera isumaqataaffigaa
Isorliunerusuni sulisorineqartut akissarsiaqartinnerunissaannik periarfissaqarnissaa qulakkeerniarlugu allanik malittarisassiortoqarnissaa Simon Simonsenip siunnersuutigisimavaa. Aningaasaqarnermulli naalakkersuisoqarfimmit taamani itigartinneqarpoq.
Taamaammat Sermersuup suliniutigisamini siunertaa aamma taperserpaa.
- Kujallermimi tamannarpiaq aamma ajornartorsiutigaarput, Simon Simonsen oqarpoq.
Tamannali isumaqatigiinniarnikkut nunalu tamakkerlugu assigiinnik malittarisassaqartitsinikkut pissasoq naqissuserpaa.
Tamanut assigiippoq
Malittarisassat Sermersuumit misissorneqarsimapput suliniutigineqartorlu toqqissisimanartinneqarluni. Lars Møller Sørensenillu kommuni kisimiilluni taamatut suliniuteqarnissaa pissutissaqarsorinngilaa.
- Kommunit allat piumagunik aamma taamatut iliorsinnaanissaat akornutissaqarsorinngilara.