Sermersuup pisortaanera: Torersaalluta aallartereerpugut
Umiarsuarmi sumiissusersiutit atornissai nalugaanni sumut ingerlariassanerluni nalunarpoq, Kommuneqarfik Sermersuup aningaasatigut inissisimanera qiviaraanni taama misigisimanartoq naatsorsuuserisoq namminersortoq naliivoq.
- Kommunep aningaasaqarnera umiarsuarmi sumiissusersiutinut assersuutissagaanni soorlu tassa atortui qanoq atorneqassanersut ilisimaneqarsimanngitsoq sumullu aallariassanerluni nalugaa, naatsorsuuserisoq arlaannaannulluunnit attuumassuteqanngitsoq Grønlands Revisionskontorimilu pisortaq piginneqataasoq Knud Østergaard kommunep naatsorsuutaanik misissuereerluni taama naliliivoq.
Kukkunersiuisup Kommuneqarfik Sermersooq aqutsinera pillugu isornartorsiorpaa
Taama assersuunneqarnertik ukiut siulii eqqarsaatigalugit eqqortuusoq Kommuneqarfik Sermersuup pisortaanera oqarpoq, erseqqissaatigaali iluarsaassillutik aallartereerlutik.
- Massakkorpiaq taama inissisimasutut oqaatigineqarsinnaanngilavut, ilorraap tungaanut massakkut aallareerpugut. Suliffeqarfittut aningaasatigulu pissutsinik qulaajaalluta aallartereerpugut, aqutsinerup nukittorsarnissaa anguniarlugu. Kommuneqarfik Sermersuup pisortaanera Steffen Ulrich-Lynge taama nassuiaavoq.
Kommunep aningaasatigut ingerlatsinera qularnartoqartoq Aningaasaqarnermut Nunamullu Namminermi Pissutsinut Naalakkersuisoqarfiup apeqqusersimavaa, tamannalu tunngavigalugu kommune sukannersumik nakkutigisarilerlugu.
Kommuneqarfik Sermersooq sukannersumik nakkutigineqalersoq
Allagaatinik takunnissinnaatitaanermik Naalakkersuisoqarfimmut qinnuteqareerluta pappilissat uppernarsaatit Radioaviisimit tiguavut, taakkunanilu atuarneqarsinnaavoq kommunep ilaatigut inissianik tuniniaanermini isertitani karsimiittuutit akornannut taamaalioqqusaanngikkaluarluni ikisarsimagai. Aammali naatsorsuuserisoq Knud Østergaard misissuereerluni naliliivoq kommunep naatsorsuutai tukaqisut.
- Oqaatsit taakku sakkortoorujussuupput, tusaatissatut tiguakka. Massakkulli inissisimanitsinnut oqaluttuartuunngillat, Kommuneqarfik Sermersuup pisortaanera Steffen Ulrich-Lynge erseqqissaavoq.
Kommuneqarfik Sermersooq ukioq manna iluarsaassilluni sipaarniarlunilu aallartereerpoq. Atorfiit pisariaqartinneqartut kisiisa pigineqalernissaat siunniuppaat soraartoqaraangallu atorfik inuttassarsiuutissanerlugu nalilersortalersimallugu. Iliuusissatut pilersaarusiortoqarpoq taakkulu saniatigut naatsorsuuserinermi nakkutilliisussanik controllerinik marlunnik atorfinitsitsisoqassalluni.
