Kukkunersiuisup Kommuneqarfik Sermersooq aqutsinera pillugu isornartorsiorpaa
Aningaasaqarnermut Nunamullu Namminermut Naalakkersuisoqarfiup aamma Kommuneqarfik Sermersuup akornanni allaffigeqatigiinnerit assilineri Radioaviisimit allagaatinik takunnissinnaatitaanermik qinnuteqareerluta tiguavut.
Karsimiittuutit ukiup naanerani 23 millionit koruuniunerat Aningaasaqarnermut Nunamullu Namminermut Naalakkersuisoqarfiup ernumanartutut februaarip 24-ani nalilerlugu sukannersumik nakkutigilerpaa naatsorsuutinillu qaammatit tamaasa nassiussisoqartarnissaa piumasaralugu.
Kommuneqarfik Sermersooq sukannersumik nakkutigineqalersoq
Naalakkersuisoqarfik marsip tallimaani naliliivoq kommunip aningaasatigut aqutsinera qularnartoqartoq aamma inatsisinik paasinnissimanersoq kontomillu kontomut nuussisarnerit pillugit maleruagassanik paasinnissimanersoq apeqquserpaa. Kommunip 2009-mit 2012-imut naatsorsuutinik iluarsaassinissaa piumasarineqarpoq qanorlu iliorluni isumannaatsumik aqutsilissanersoq nassuiaasioqquneqarluni.
Kommuni aningaasanik aqutsinerliorujussuarsimasoq kukkunersiuisoq arlaannaannulluunnit attuumassuteqanngitsoq Grønlands Revisionskontorimilu pisortaq piginneqataasoq Knud Østergaard misissuereerluni ima naliliivoq:
- Kommunip aningaasanik aqutsinerliorujussuarsimanera nakkutigineqalerneranut peqqutit pingaarnersarisimassavaat. Assersuutigalugu umiarsuarmi sumiissusersiutit atorneqarsinnaanersut atorneqarsinnaannginnersulluunniit ilisimanngikkaanni sumiinnerluni nalunassaaq, sumullu aallariassanerluni nalunassaaq. Taamaannera ajornartorsiutinngorsinnaavoq, pingaartumik Kommuneqarfik Sermersuutut milliardit koruunit aappaa avillugu kaaviiaartitaqaraanni. Knud Østergaard nassuiaavoq.
Knud Østergaard aamma oqarpoq Kommuneqarfik Sermersooq aningaasarliortutut taaneqarsinnaanngitsoq, ajornartorsiutigineqartorli tassaasoq sulisut pikkorikkaluarlutik ikippallaarnerat. Pissutsit ajornerulissanngippata kommuni iluarsaassisariaqartoq aamma erseqqissaatigaa.
