Sermersuup kulturimik nittarsaasartortaava aajuna

Tamannalu kulturikkut illorsuarmi Katuami aaqqissuussinermi pivoq. Siorna kulturikkut nittarsaasartuusoq, Arnannguaq Gerstrøm, 2013-imi kulturikkut nittarsaasartuunermi nassataanik Nunani Avannarlerni Venezuelamilu tusarnaartitsinerpassuit angalanerpassuillu pillugit oqalugiarpoq.

- Tupaallaatigeqaara taaguut taamak sunniuteqarluni matorpassuarnik ammaasinnaammat, Nunatsinni nunanilumi allani, Arnannguaq Gerstrøm ilaatigut taama oqarpoq.

Oqalugiareermallu borgmester Asii Chemnitz Narupip 2014-imi kulturimik nittarsaasartussaq toqqarpaa, tassalu Naja Rosing-Asvid.

Toqqagaasoq illuliassanik tisartaasartutut ilinniagaqarpoq ukiunili arlalissuarni eqqumiitsuliortutut assigiinngitsorpassuartigut suliaqarsimalluni.

Nuummi innuttaasut Katuap akiatungaani katerittarfimmi Amisuni, meeqqat inersimasullu kateriffigissallugu nuannarisaanni, amisunik ilusilersuisutut ilisarisimanerpaagunarpaat.

Aammali qalipaasarpoq sanaaluttarlunilu kiisalu aamma meeqqanut atuakkanik arlalinnik saqqummersitsisimalluni.

-Ukiormanna eqqumiitsuliortoq tamatigoortoq soqutiginartorlu aamma eqqumiitsuliamigut nipangersimaannarsinnaanngitsoq kulturimik nittarsaassisartussatut toqqarparput. Taassuma eqqumiitsuliorneq anersaartornertulli nalinginnaatigisutut isigaa, borgmester Asii Chemnitz kulturimik nittarsaasartunngortitsinermini taama oqarpoq, taannalu qujassuteqarluni ilaatigut ima oqarpoq:

- Tassuunakkut avatangiisitta ilusilersornerani kulturitta qanoq atorneqarsinnaaneranut isumassartitsisinnaassallunga neriuutigaara.