Sermersuup borgmesterertaavanut apeqqutit arfinillit
Asii Chemnitz Narup (IA) Nunatsinni kommunit anginersaanni ukiuni qulini borgmesterioreerluni marlunngormat tunuarpoq. 32-nillu ukiulik Charlotte Ludvigsen borgmesterinngortinneqarpoq, taannalu kingoraakkami ukiuisa affaannaanik ukioqarpoq.
Suliassalli pingaarnerit ilaat qanoq isumaqarfigai, aamma kommunip siunissaa pillugu qanoq eqqarsaatersuuteqarpa? Apeqqutit tamakku tullinnguuttumi akissutissarsiffigisinnaavatit.
Borgmesteritut suliassaqarfiit sorliit pingaarnerutillugit suliniuteqarfiginiarpigit?
- Pingaarnertut suliniuteqarfigerusutakka soorunami tassaapput meeqqat inuusuttullu. Aamma kommuni inissiat, inuussutissarsiorneq takornariartitsinerlu pingaartillugit suliniuteqarfigissavakka. aamma mittarfiliortiternermut tunngatillugu suliassanut angisuunut piareersarnissarput sulissutigissavara. Kiisalu aamma isumaqarpunga suliarisartakkatsinni tamani kulturerput ilanngunneqartariaqartoq.
AAMMA ATUARUK Borgmesterimut allattaasimasoq borgmesterinngortoq
Qanoq isumaqartillugu? Uatsinnummi inuttut pingaaruteqartupilussuuvoq kinaassutsitta, kultuuritta oqaatsittalu piginissaat, taamaammat isumaqarpunga aalajangiissatilluta tamakku pingaarnertut suliniuteqarfigisatsinni tamani ilanngunneqartariaqartut.
Isumaginninnermut suliassaqarfiup suliniuteqarfiginissaa siulerisannut naleqqiullugu qanoq allaanerussuteqassava?
- Aaqqiissutissamik pitsaanerpaamik nassaarniarluta assigiinngitsunik periaaseqarluta annertuumik suliaqarpugut, taamatulli suliaqartigigaluarluta suli iluatsissimanngitsutut isikkoqarpoq. Taamaammat innuttaasut qanoq isumassarsiaqarnerat tusarusupparput, aamma taakkunanngaanneersuusariaqarmat. Innuttaasut, Naalakkersuisut borgmesterillu assigiinngitsut, tamakkulu Asiimit (Chemnitz Narupimit, aaqq.) aallartisarneqareerput. Partiimut sorlermut ataneq apeqqutaatinnagu aaqqinniagassaapput, Charlotte Ludvigsen oqarpoq.
Kommunimi inunnik isumaginninnermut suliassaqarfiup Naalakkersuisunit aqunneqalersinnaanerata periarfissaanera Naalakkersuisunit siornatigut oqaatigineqarpoq. Tamatumunnga isumaqataavit?
- Naalakkersuisunut arlaleriarluta ikioqqugaluarpugut. Ataatsimoorlutalu aaqqiissutissarsisinnaanissarput soorunami neriuutigivara, aamma suli isumaqarpunga Naalakkersuisunut tunniussassaqarluarluta. Taamaammat arlaatigut akisussaaffinnik arsaartuinani suleqatigiittoqartariaqarsoraara, borgmesteri oqarpoq.
AAMMA ATUARUK Charlotte Ludvigsen Kommuneqarfik Sermersuumi borgmesterinngortoq
32-nnarnik ukioqarputit. Misilittakkatit borgmesteritut sulinissamut naammassorivigit?
- Ukiuni aqqaneq-marlunni politikkimik suliaqarpunga, aamma politikkimik suliaqarneq peroriartuutigivara, Kuupik, Tuusi Asiilu siulittaasorisarlugit. Taamaammat misilittagaqarluarlunga misigivunga, politikkimik suliaqarninni inuit pikkorissut akornanniittuarama, Charlotte Ludvigsen oqarpoq.
Kuupik Kleist aamma Tuusi Motzfeldt Inuit Ataqatigiinni siulittaasuusimapput, Asii Chemnitz Narupilu partiimi siulittaasup tullerisimallugu.
Kommunalbestyrelsimi eqqissiviilliortoqangaatsiarpoq - ingammik Demokraatinut tunngatillugu. TamaHvordan vil du skabe ro igen?
- Siullertut appisaluussisaqattaarnerit unitsittariaqarpagut. Aamma partiit tamaasa tusarnaarnissaat pingaaruteqarpoq, taamaalilluta ataatsimoorussamik suliniassagatta. Kisianni soorunami aamma isumaliortaatsit anguniakkallu ilaat pissutigalugit isumaqatigiittuaannanngilagut, isumaqatigiissinnaajuaannarnissarpulli soorunami neriuutigivara, Charlotte Ludvigsen oqarpoq.
AAMMA ATUARUK Asii Chemnitz Narup borgmesteritut tunuarpoq
Kommuneqarfik Sermersooq på 635.000 kvadratkilometerisut annertutigivoq, illoqarfinnilu nunaqarfinnilu pissutsit assigiinngitsorujussuupput. Maannamut ineriartortitsineq Nuummuunerusoq iluaqutaavoq. Ineriartortitsinerup illoqarfinnut mikinerusunut nunaqarfinnullu ilaqutaanerunissaa qanoq ilillutik qulakkeerniarpiuk?
- Illoqarfiit pingaarnersaannut periusissaq kommunalbestyrelsimi suliarivarput, aammali illoqarfiit allat, soorlu Paamiut, Tasiilaq Ittoqqortoormiilli peqatigaluta ineriartornissaat siunertarivarput. Aamma nunaqarfiit pillugit immikkoortumut pilersaarusiaqarpugut, nunaqarfiit nukittuffigisaminnik ineriartortitsinermikkut nammineernerulernissaat anguniagaalluni. Tasiilamut tunngatillugu Nuummut aamma nutsertorpassuaqarpoq, taamaammat Tasiilami suliffinik pilersitsinissarput pingaaruteqarpoq.
- Suliffeqarfimmik innuttaaasunik ikiortarialinnik suliffissaqartitsisinnaasumik pilersitsinissaq maannakkorpiaq sulissutigivarput. Danmarkimi Kringsminde isumaqatigiissuteqarfigaarput. Suliffeqarfimmik inuiaqatigiinni akisussaaqataasumik pilersitsinerusuppugut. Pingaartumillu inuusuttut ukkatarineqassapput, taakku akisussaaffimmik tigusinissamik, suleqatigiilluarnermik ullaakkut makilluni suliffimmik paarsinissamik ilinniartinniarlugit. Suliffeqarfiup najukkami takornariartitsinermik ukkaqarluni caféunissaa pilersaarutaavoq, Charlotte Ludvigsen oqarpoq.
