Asii Chemnitz Narup borgmesteritut tunuarnermini kommunalbestyrelsenit aamma tunuarpoq. Assi: Asii Chemnitz Narup fra mødet i kommunalbestyrelsen.

Charlotte Ludvigsen Kommuneqarfik Sermersuumi borgmesterinngortoq

Charlotte Ludvigsen Kommuneqarfik Sermersuumi borgmesterinngorpoq. Taassuma borgmesteritut atuuffik Asii Chemnitz Narupip kommunalbestyrelsenit anivilluni tunuarneratigut nangippaa.

Asii Chemnitz Narupip Kommuneqarfik Sermersuumi borgmesteritut tunuarnerani ullormi tassani borgmesterinngortussamik aalajangiisoqarpoq.

Charlotte Ludvigsenip borgmesteritut atuuffik nangippaa.

Kommunalbestyrelsemi ataatsimiinnermini tamanna aalajangerpaa.

- Borgmesteritut atuuffiup tigunerani misigissutsit assigiinngillat, pissutigalugu borgmesteriusimasut ingerlateqqinniartussaagakku, Charlotte Ludvigsen kommunalbestyrelsemi ataatsimiinnermi oqarpoq, nangillunilu:

- Neriuppunga suleqatigiissinnaassalluta partiilersoratalu, aaqqitassarpassuaqarpugummi.

Charlotte Ludvigsen borgmesteriugunnaartup, Asii Chemnitz Narupip Kommuneqarfik Sermersuumi borgmesteritut kommunalbestyrelsemiillu tunuarnerani nangitsisussatut piukkunneqarnerit ilagaat.

Borgmesterinngortoq kommunimut 2017-imi qinersisoqarnerani 77-init taaguunneqarpoq. Asii Chemnitz Narup qinersinermi tassani 2.259-init taaguunneqarpoq.

Kommunalbestyrelsemi nikerartoqartoq

Charlotte Ludvigsen Aningaasaqarnermut Inuussutissaqarnermullu ataatsimiititaliami siulittaasuullunilu borgmesteriussaaq.

AAMMA ATUARUK Kommuneqarfik Sermersooq ullumi borgmesterertaassaaq

Charlotte Pike siulersuisuni sinniisussaasimasoq, Asii Chemnitz Narupili maanna taarserpaa.

Tamatuma saniatigut Lone Rosengreen Pedersen Marlene Lyngemut siornali ilinniaqqinnini pissutigalugu ukiuni marlunni Danmarkimiinniarluni sulinngiffeqalersumut sinniisuusumut sinniisuulerpoq.

DR-ip piviusulersaarutaa pisunut aallarniutaasoq

Asii Chemnitz Narupip kommunalbestyrelsenit tunuannginnermini ukiuni aqqanilinni borgmesteriusimanerminit tunuarniarneranut pissutaasoq oqaluttuaraa.

- Qitiusoq Tasiilami inuiaqatigiinni ajornartorsiutit pillugit aallakaatitassiamiippoq. Kingornatigullu oqaatigineqartut arlariipput. Piffissaatinnagu tunuarnissara takorloorsimanngikkaluarpara, taamaammat takorloorneqarsimanngitsutut oqaatigisinnaavara, Asii Chemnitz Narup oqarpoq.

Maanna borgmesteriusimasup DR-ip aallakaatitassiaanut atatillugu DR-imit apersorniarneqarnermini sulinngiffeqarluni, imminut illersorluni piffissangaatsiaq atorpaa.

DR-ip Tasiilami inuiaqatigiinni ajornartorsiutit pillugit piviusulersaarutaa maajip arfernani aallakaatinneqarmat Nunatsinni aalassassimaartoqalerpoq. Tassangalu innuttaasut politikerillu Danmarkimit isumaginninnermut ikiorneqarnerunissamik piumasaqaqqusipput, Naalakkersuisullu tamatumani utaqqimaartitsillutik.

Inatsisartunili amerlanerussuteqartut Naalakkersuisut Danmarkimit ikiorneqarnerunissamik piumasaqarnissaat kimiisissutigaat Naalakkersuisullu tamatumani tunniutiinnarput.

Tamatuma saniatigut Asii Chemnitz Narup Naalakkersuisut siulittaasuanut, Kim Kielsenimut peqqinnissamullu Naalakkersuisumut Martha Abelsenimut isornartorsiuvoq, oqaatigalugu Naalakkersuisunut pissutsini qasseeriarluni isumaginninnermut susassaqarfimmut ikiorneqarnissaminik piumasaqartarsimagaluarluni itigartinneqartarsimalluni.

Tamatumani kingorna borgmesteri Facebookikkut allagaqarluni Kim Kielsen qinersititsisariaqarnerarpaa Demokraatinullu sammisumik – partiit Naalakkersuisunut tapersersuisut Inuit Ataqatigiit Kommuneqarfik Sermersuumi suleqatigisai paasisinnaannginnerarpai.

Tamannalu pissutigalugu Demokraatit Asii Chemnitz Narupimut tapersersuinertik sapaatip akunnerata siuliani tunuartippaat.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat