Michael Rosing borgmesterinngortitsinissamut matuersaataalluarsinnaavoq. Assi ToqqorsivimmitAssi: Kommuneqarfik Sermersooq

Kommuneqarfik Sermersooq ullumi borgmesterertaassaaq

Kommuneqarfik Sermersuumi borgmesterip, Asii Chemnitz Narupip, ingerlaannartumik atuutilersumik tunuarnerata kingorna Kommuneqarfik Sermersooq nutaamik ullumi borgmesterertaassaaq. Suleqatigiissitsisut IA-meersumik toqqaanissartik naatsorsuutigaat.

Kommuneqarfik Sermersuumi pisoqangaatsiarpoq. Borgmesterip Asii Chemnitz Narupip ingerlaannartumik atuutilersumik tunuarnera aalassassimaarutaavoq. Kommunimut ilaasortat kina borgmesterinngussanersoq ullumi sisamap qeqqanit atatsimillernerminni aalajangissavaat.

Sermersooq 19-inik ilaasortaqarpoq. Taakkunannga qulingiluat IA-meersuupput, Siumumit arfineq marluk, Demokraatinit marluk Suleqatigiissitsisuniillu ataaseq.

Taamaammat IA amerlanerussuteqassaguni partiimit allamit tapersersorneqartariaqarpoq. Tamanna Suleqatigiissitsisuninngaanneersinnaavoq.

- Ilimanaateqartorujussuuvoq, isumaqatigiinniarnerpulli suli naammassinngilaq, Suleqatigiissitsisut sinnerlugit Kommuneqarfik Sermersuumut ilaasortaq, Michael Rosing oqarpoq.

Taannali aappaagu augustip aallaqaataata tungaanut sulinngiffeqartumut Demokratineersumut Nivi Olsenimut sinniisussaannartut issiavoq.

Nivi Olsenili aappaagu uteraluarpalluunniit ullumi borgmesterinngortoq ikinnerussuteqaraluarluniluunniit borgmesteriusinnaavoq.

Nivi Olsenilu siorna Qeqertarsuarmut nuuttoq Nuummut utilersaanngilaq.

- Sulinngiffeqarnera sivitsorpara ukioq ataaseq, taannalu allagaq ippassaq tunniuppara, taamaammat Asiip tunuarneranut peqquteqartumik arlaannilluunniit uternianngilanga, aamma amerlanerussusiiniaannarlunga uternianngilanga, Nivi Olsen taama oqarpoq.

Kommuneqarfik Sermersuumi IA-p gruppemi siulittaasuata Harald Biancop, kina borgmesteritut piukkunneritsik oqaatigerusunngilaa. Siumut Demokraatit peqatigalugit amerlanerussusiinissaminnut ikippallaarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat