DMI: Sermersuup kiassusia rekortiliigunarpoq

4,7 grader.

DMI’p Summitimi sermersuup qaavaniittumi silasiorfiata taama kiatsiginera tallimanngormat uuttorpaa. Uuttuineq ilumoortuusimappat aatsat taama kiatsigisimassaaq.  

DMI’mi seniorklimatologiusoq John Cappelen taama oqaluttuarpoq.

- Aggustip aallaqqaataani ualikkut uuttuinitsinni 2,7 gradiusoq uuttorparput, aggustillu aappaani 4,7 tikillugit uuttorlugu. Soorunamilu tassaapput kiassutsit annertoorujussuit, uuttuisimasunillu allanit ilumoorneri paaserusupparput, oqarpoq.

Taamaattumik paasisat Amerikamiut silasiorfianni uuttukkanut naleqqiunneqassapput, taanna aamma DMI’p inissisimaffianiippoq. Massakkorpiarlu misissuineq ingerlanneqarpoq.  

AAMMA ATUARUK Video: Avannaani ulloq kiarujussuarfik kingulleq

Silaannaq kiattoq nunatsinnut anguttoq Europaminngaanneersuusoq, taassuma nassuiaappaa.

- Una kiassuaq juulip naalernerani aggustillu aallaqqaataani Kalaallit Nunaanniittoq, tassaavoq kiassuaq Europamut aamma anngunnikoq, avannaanullu Kalaallit Nunaanut anngussimasoq. Tamannalu Kalaallit Nunaanni tamalaani kiassiortitsisimavoq,John Cappelen oqarpoq.

AAMMA ATUARUK Europami kiarujussuarnera nunatta avannaanut annguppoq

Soorli taama kiatseriasaarsimanera taassuma oqaatigisinnaangilaa. Silaannaalli allangoriartulernera peqqutaasinnaanera John Cappelen isumaqarpoq. 

- Ilaatigut kiassuataartarpoq, ilaatigullu nillerujussuartarluni. Taamatut sila allangorartarpoq, kisianni aamma silap allanngornerata ilisarnaatai taassunga tunngassuteqarsinnaapput, nalunnginnatsigumi nunarsuarmi sumi tamaani kiatsikkiartuaartoq aammalu Kalaallit Nunaanni. Sumilli pissuteqartoq suli oqalliserineqarpoq, John Cappelen oqarpoq.

Juuli nunarsuaq tamakkerlugu kiannerpaaffiusimasoq uuttorneqarsimasoq, EU-p sila pillugu kiffartuussisoqarfiata, Corpenicus Climate Change Servicep nalunaarutigaa.