Video: Avannaani ulloq kiarujussuarfik kingulleq

Europap kiarujussuarnerata silaannaa Nunatta Avannaa tikillugu avannarpartermat allaat 20 gradit angullugit kiatsisillugu Ilulissani qarleeraannallit takussaalerput. Avannaani nalinginnaasumik juulip silaanit kiannerungaatsiarpoq.

Kisianni qarleeqqat qarlinnik taarserneqartariaqalissagunarput, tassami sapaatip akunnerata naanerani sila pisarnerminut uteqqissamaarunarmat.

- Naajartulerpoq. Upernavimmi suli silageqaaq, Qaarsunilu mittarfimmi kiak 19 gradinut uuttorneqarpoq, sapaatilli akunnerata naanerata ingerlanerani sila ileqquminut uteqqissaaq, Danmarks Meteorologiske Institutimi, DMI-mi, silasiortoq Jens Lindskjold oqarpoq.

AAMMA ATUARUK Europami kiarujussuarnera nunatta avannaanut annguppoq

Uummannami eqqaanilu tallimanngornermi ataatsimut isigalugu kiassaaq. Ukkusissani kiannerpaassaaq 17 gradinik kialluni, Ilulissanili 16 gradinik kiassalluni.

Kalaallit Nunaanni kiarujussuarnerani kiassutsimik qaffasinnerpaasuuliisoqarnissaa DMIp ilimaginngilaa. Ilulissani kiannerpaaffiusimasoq 21,7 gradiniippoq Upernavimmilu 20,3-ulluni.

Avannaani ulluni kingullerni silap kiarujussuarnera silaannaap Europamit ingerlaneraneersuuvoq, sapaatip akunnerani kingullermi Europami 40-t qaangerlugit kiassiortitsisarnermigut nunat tulleriiaarlugit qaffasinnerpaaffeqartilerlugit.