Europami kiarujussuarnera nunatta avannaanut annguppoq
Iluliarmiut Upernavimmiullu nunatsinni ulluni tulliuttuni kiassiornerpaanissartik usorsisimaarutigisinnaassavaat. Silaannarmi kissartoq avannaannut ullumikkut apuutissaaq.
Ilulissanilu marlunngorpat 20-t angullugit kiassaaq, unnuakkullu 15-it missaanik kiassalluni. Upernavimmi 15-t angullugit kiannissaa ilimasaarutigineqarpoq. Kiassuartut taaneqavissinnaanngikkarluartoq naliginnaasumiit kiannerussaaq.
- Kalaallit Nunaanni 30-nik kianneq ajorpoq, kisiannili avannaani ukioq manna juulimi naliginnaasumit kiannerussaaq, DMI-imi silasiortoq, Jens Lindskjold oqarpoq.
Rekortiliiffiussasoq naatsorsuutigineqanngilaq
Silaannaq kiattoq nunatsinnut anguttoq Europaminngaanneersuuvoq, Europami 40-t qaangerlugit kiattaqattaarluni aatsaat taama kiatsigivoq. Nunatsinnili kiannera rekortiliiffiussasoq, DMI-miit naatsorsuutigaangilaat. Ilulissani 21,7 kiannerpaaffiusimavoq, Upernavimmilu 20,3 kiannerpaaffiusimalluni.
AAMMA ATUARUK Europami kiarujussuarnera sermersuarmut sunniinerlussinnaavoq
Silaannaap kissartup Europameersup nunatsinnut apuuttarnera naliginnaasuuvoq, kisianni massakkut silaannaq pisarnermit kiannerulaartoq, Jens Lindskjold oqarpoq:
- Naak silaannaap kissartup Sermersuaq qarsukkaluarlugu kissassutsini annertooq suli pigivaa, Jens Lindskjold oqarpoq.
Ilulissani Upernavimmilu sisamanngorneq tikillugu kiannissaa DMI-p naatsorsuutigaa, tallimanngorpamiillu naliginnaasumik kiassuseqalissalluni. Silaannaap kissartup Aasiaap avannaaniiginnarnissaa silasiortup naatsorsuutigaa.
Nunatta avannaani silaginnissaa ilorrisimaarutissaavoq, sermersuulli aakkiartornera annertunerulersissinnaavaa. Aasajaarluni kiannerata saniatigut silaannaap kissartup anngunnera kiannerulersitsimmat.
- Qularnanngilaq sermersuup aakkiartornera ulluni pingasuni tulliuttuni annertussasoq, Jens Lindskjold oqarpoq.
Kiarujussuarnerani sermersuaq qanoq annertutigisoq aassimassanersoq DMI-imiit naliliiffigiumaarpaat.