WMO: Europami kiarujussuarnera sermersuarmut sunniinerlussinnaavoq
Europap ilarujussuani ulluni makkunani kiassiorujussuarput. Kiassiornerujussuulluni sermersuamut kinguneqarnerlunnissaa nunarsuaq tamakkerlugu silasiornermut tunngasunik suliaqartartut kattuffiata, WMO-p ernummatigaa.
Afrikap avannaani silaannaap kiattup Europap sinneranut aatsaat taama kiatsigititsisoq FN-ip immikkoortortaqarfiani WMO-p oqaaseqartartuata Claire Nullisip oqaatigaa. Sumiiffiit ilaanni gradenik ataatsimik, marlunnik pingasunik sisamanillumi aatsaat taama kiannerutigisoq "tupinnarluinnartuusoq" taassuma oqaatigaa.
AAMMA ATUARUK Nalinginnaasumit kianneruvoq
- Kiarujussuarnissaanik ilimasaarutit ernumatitsipput, silaannaallu kiattup Kalaallit Nunaanut ingerlaarnissaa ilimasaarutigineqarpoq, Claire Nullis oqarpoq.
Sermersuup aakkiartornerminit millerujussinnaanera ilimanaateqartoq WMO-mit oqaatigineqarpoq. 2012-mili rekordiliilluni kiannerpaaffiginikuusaanit kianneruleratarsinnaanerarlugu.
- Kiarujussuarnerata kingunerisaanik sermersuaq aakkiartupiloorsinnaavoq. 2012-imi kiannerpaaffigisimasaa qaangissaneraa suli nalunarpoq, taamaaleratarsinnaavorli, WMO-p oqaaseqartartua oqarpoq.
Nunarsuatta silaannaanut Sermersuaq sunniutilerujussuuvoq. Sermersuummi aakkiartupiloorneranit immamut qaffatsitserujussuarsinnaavoq.
- Sermersuaq 160 milliardit tonsimik juulip qaammatannaani aassimavoq. Taakku naluttarfiit 64 millionit annertoqqatigalugu, Claire Nullis oqarpoq.
/ritzau/Reuters