Aasaq manna kianneruvoq: Nalinginnaasumit kianneruvoq

Ukiormanna kianneruvoq sermersuarlu siusinnerusukkut aakkiartorluni. Qaammatini kingullerni pingasuni nalinginnaasumit gradinik pingasunik kianneruvoq. Tamanna nalinginnaasuuvoq, silasiortoq taama oqaluttuarpoq, tamannalu sermersuarmut immallu sikuanut kinguneqarpoq    

Ukioq manna kianneruvoq. Nunatsinni sumiiffinni amerlanerni nalinginnaasumit kianneruvoq.

-  Sumiiffinni amerlanerni qaammatit pingasut kingulliit ingerlaneranni nalinginnaasumit kiannerusarpoq imaluunniit nunatsinni silasiorfiit tamangajammik uuttortaanerannit taama takutitsipput, DMI-mi silasiortoq John Cappelen taama oqaluttuarpoq.

Silap pissusaa nalinginnaasoq
DMI nunatsinni silasiorfinnit paasissutissanik katersisarpoq, agguaqatigiissillugulu silap kiassusianik nillissusianillu uuttortaasarluni, qaammatit tamaasa ukiut 30-it ingerlaneranni.
Uanilu uuttortaanerit pineqartut tassaapput ukioq 1961-imit 1990-ip tungaanut.
Tassalu silap pissussaa nalinginnaasoq DMI-p nittartagaani DMI.DK-mi takuneqarsinnaavoq.

Ima iliorpugut
Agguaqatigiissillugu kiassuseq nunatsinni sumiiffinni assigiinngitsuni 13-ini qaammatini kingullerni arfinilinni KNR-imi assersuusiorneqarput.

Paasissutissat: DMI 

Kiassutsit DMI-p nalinginnaasumik uuttortartagaannut saniliunneqarput.

Silasiorfiit ataasiakkaat apriilip, maajip juunillu qaammataanni nalinginnaasumit kiannerupput, amerlanerusulli kiannerujussuupput.

Silap allanngorarnera nalinginnaasoq

Silasiortoq John Cappelen oqaluttuarpoq, kianneruneranut pissutaasoq silaannaq kissartoq nunatta nalaanut pisimammat.

- Silap pissusilersorneranut atatillugu silaannaq kissartoq Kalaallit Nunaata nalaanut pisimavoq, tamannalu pissutigalugu upernaaq manna aasallu aallartisimanerani kiatsissimalluni, Cappelen oqarpoq. 

Tamanna immikkut ittutut isigineqartariaqanngilaq nalinginnaasuuvoq.

Sila allanngoraannaavittuuvoq, John Cappelen taama nassuiaavoq, siornalu aasap nillernerunera isugutanneruneralu innersuussutigalugu.

Silap pissusia ukiut tamaasa nalinginnaasumik allanngortaraluartoq kiannerunera malunnartumik kinguneqarpoq.

 

Assi: KNR / Paalu Møller

 

- Sermersuup aakkiartortarnera qaammammik ataatsimik siusinnerusukkut aallartippoq,

- aamma immap sikua siusinnerusukkut aakkiartorluni, John Cappelen oqarpoq,

Qaanaallu eqqaani qimussit putsinnikkoortut sikukkut ingerlaartut assilineqarnerat innersuussutigalugulu.

- Sumiiffiit ilaanni immap sikua sukkanerusumik nunguttarpoq, sermersuarlu maannakkutut aakkiartuinnassappat sikup sermersuullu aakkiartortarnerat sivitsussaaq, tamannalu piffissap takutikkumaarpaa, John Cappelen oqarpoq.

Qaammatini pingasuni panernartoq

Ukiut qulikkaat kingulliit ingerlaneranni Kalaallit Nunaanni, Issittumi nunarsuullu sinnerani nalinginnaasumik kiannerujussuanngorpoq. Tamanna assortorneqarsinnaanngilaq, John Cappelen oqarpoq.

Ukiormannalu kiannerunerunera nunarsuarmi silap pissusaata allanngoriartorneranut pissutaatinneqarsinnaanngilaq.

Kisianni silap pissusiata allanngoriartorneranut takussutissaanera assortorneqarsinnaanngilaq, Cappelen oqarpoq. 

- Kiannerunerata saniatigut siallerpianngilaq.

- Sumiiffiit ilaanni pinngortitami ikuallattoqarsinnaavoq, kujataanilu naatitat imissaaleqilersinnaapput. 

Nuna tamakkerlugu upernaap qaammataani panernarnerusimavoq, avannaanilu juunimi nalinginaasumit siallernerusimalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat