Sermersuup aningaasat amerlanerusut annaarataannaagai
Akiitsullu amerliartuinnarput, taakkulu akilerneqartarnissaannut Namminersorlutik Oqartussat iliuuseqarnerunngippata, kommunip akiitsorineqartut ilaat sussakkiiginnartariaqassallugit ernummatigaa.
- Sussakkiiginnartariaqartakkat qangali ikinaarneqartarsimassasut aarleraara, kommunip pisortaa, Lars Møller Sørensen oqarpoq.
AAMMA ATUARUK Sermersuup akiitsut qaffakkaluttuinnarnerat erloqinarneraraa
Kommuneqarfik Sermersuup 5 millionit koruunit missaasa sussakkiiginnarneqarnissaat 2017-imut missingersuutigigaluarpaa. Maannamulli naatsorsuutit naapertorlugit 26 millionit koruunit sinnerlugit sussakkiiginnarneqarput.
Innuttaasut katillugit 339 millionit koruuninik kommunimut 2017-ip naanerani akiitsoqarput. Taamaammat Kommuneqarfik Sermersooq ukiut tamaasa akiitsunik taama amerlatigisunik sussaakkeerinnittassanani neriuppoq.
- Tamanna pinngitsoortinniarlugu, Namminersorlutik Oqartussat suleqatigalugit suliami uani iliuuseqajaarnerusassasugut isumaqarpunga, taamaasilluta akiliisimanngitsunut ajornartorsiuterujussuanngunnginnerani naammassisaqarsinnaalluta, Lars Møller Sørensen oqarpoq.