Sermersuup innarluutillit inuusuttut sammisassaat pitsanngorsarpai
Tassami ornittagaq Kammagiit nukittorsaavigineqarniarpoq, innarluutilinnillu sullissineq pitsanngorsaaviginiarneqarluni. Ornittagaq Kammagiit nutaamik aalajangiisoqarneratigut tassaalissaaq inuusuttunut neqeroorut. Kommuneqarfik Sermersooq tusagassiuutinut taama ilaatigut allaaserisaqarpoq.
- Angajoqqaat suleqatigiiffiisa innarluutilinnullu suliniaqatigiiffiit oqariartuutaat naalaarniarsimavagut, tamatuma nassataanik siunissami perorsaanermik aallaavilimmik nqerooruteqarsinnaalissalluta inuusuttunut suliniutit pitsaanerusut anguniarlugit ingerlatsisinnaalissalluta, Isumaginninnermut, Suliffissaqarnermut Inuussutissarsiornermullu Ataatsimiititaliap siulittaasua Malene Lynge taama oqarpoq.
Aamma atuaruk Innarluutillit sapaatit akunneranni skizofrenii sammineqassaaq
Allannguutit taakkartorneqartut aallaavigalugit Kommuneqarfik Sermersooq inuusuttunut pitsassuarmik neqerooruteqalissasoq nalunaarutigineqarpoq, inuusuttut kinaassusiannut naapertuuttoq, inersimasutullu inuuneqlernissaannut piareersarfiusinnaasussaq, kommune taama allappoq, inuusuttut sapinngisamik imminnut ikiorsinnaalernissaat neriuutaalluni.
- Perorsaanikkut anguniarneqassaaq inuusuttut ataqqineqarnermik misigisimalernissaat, ulluinnarni suliassanik isumaginninnerminni naleqartinneqarlutik aamma ulluinnaat nalinginnaasut ajunngitsumik ingerlanneqarsinnaanerannik misilittagaqalersinnerisigut, Malene Lynge oqarpoq.
Aamma atuaruk Meeqqat innarluutillit immikkut ikiorserneqarput
Orinittagaq Kammagiit inuusuttunut assigiinngitsunik periarfissiissaaq, soorlu nammineq angerlarsimaffeqalernissamut sungiusarneq, assersuutigalugu nerisassiorneq, pisiniarneq, illup iluani suliassat, errorsineq ilaalu ilanngullugit. Atuartinneqarnermik neqeroorutit, pillorissaasunik peqateqarluni sungiusarnernik neqeroorutit, ilinniaqqinnissamut ilitsersuinerit, inuusuttut sukisaarsartarfii, café sannavinnilu sulinernik neqeroorutit aamma periarfissassaasut Kommuneqarfik Sermersuup nalunaarutigaa.
