Suka peqqissiartorpoq: Inuunerup qanoq erlinnartiginera paaseqqittutut-ikkaa

Kræfteqarnerluni misissortereernermi paasinissaata tungaanut eqqarsaateqarnarsimavoq. Suka katsorsartereerluni oqalunniarnermik aamma sungiusartariaqarsimavoq.
 
Suka K. Frederiksen nappaammik kræftimik eqqorneqarnermi kingorna inuunermi pingaarutillit eqqarsaataanut qanittunnguupput taannami isumaqarpoq nappaat kræfti inuunermi misilitsiffiusoq.
 
- Nappaaguna aamma misilitsiffiusoq. Ilaa inuuneq allatorujussuaq, kinaluunniit eqqugaaffigisinnaasaa iserfigalugu aamma isumaliuterpassuarnik pilersitsisarami, Suka K. Frederiksen taama oqarpoq.
 
Suka K. Frederiksen kræfteqalersimasinnaanerminik aasaq pasitsaassaqarpoq. Misissortereernermi kingorna
kræftimik nappaateqarnerluni apeqquterpassuit takkussuupput taamaalineranilu tapersersorteqarnissaq pingaaruteqarpoq.     
 
- Ullut taakkua amigaateqarnaqaaq. Ilaa oqaloqatissaq kinaana tapertaassava? Qaqugu paasissavara? Paasissavara iluartoq imaluunniit ingerlaqqissinnaassuunga? Unilerpunga? Apeqquterpassuasiit assigiinngitsut saqqummikaasartut ilungersunarput eqqarsartaatikkut. Taamaattumik ikorfartuisoqarnissaq tassani pingaaruteqartorujussuuvoq, Suka K. Frederiksen oqarpoq.

AAMMA ATUARUK Suka K. Frederiksen napparsimasutut nalunaarutigineqartoq

Suka oqqamigut kræfteqartoq  paasitinneqarpoq. Tamannalu pissutigalugu naalakkersuisutut sulinngiffeqarpoq aggustip qaammaataa naalersoq. Danmarkimi katsorsartereerluni oqalunniarnermigut ajornartorsiorpoq oqallorissartariaqalerlunilu.  

- Siullermik nipiga ippinnarpoq, ajorpoq. Taava aamma oqalunniarnera, oqara ilanngarneqarnikuuvoq qungasikkullu suliarineqarnikuullunga. Taamaattumik oqalunneq sungiusaqqaartariaqarpara, suli maannakkut sungiusarpunga aamma pitsanngorsarnissaa tamakkiisumik neriuutigivara angusinnaasallugu, Suka K. Frederiksen oqarpoq.
 
Suka K. Frederiksen peqqissiartornermini ullut ataasiakkaarlugit inuunerullu qanoq erlinnartiginera paaseqqittutut ippaa. Taamaammat:
 
- Ungannerusumut pilersaarusiornaveersaarpunga suli maannakkut napparsimmaviliartarpunga sapaatip akunneranut pingasoriarlunga. Taamaattumik nukissakka tassunga atorallarpakka, Suka K. Frederiksen oqarpoq.

Suka novembarip aallaqqaataata tungaanut sulinngiffeqassaaq, naak sivisunerusumik sulinngiffeqarnissaa nakorsap piumasarigaluaraa.